केजरीवालांबाबत करणार सर्वात मोठा खुलासा, कपिल मिश्राचा दावा

अरविंद केजरीवालांविरोधात शुक्रवारी (दि.18)आतापर्यंतचा सर्वात मोठा खुलासा करणार असल्याचा नवीन दावा कपिल मिश्रांनी केला आहे.

ऑनलाइन लोकमत

नवी दिल्ली, दि. 18 - दिल्लीचे मुख्यमंत्री अरविंद केजरीवाल यांनी मंत्रीमंडळातून बडतर्फ केल्यानंतर कपिल मिश्रा यांनी केजरीवाल आणि आम आदमी पक्षावर खळबळजनक आरोपांची मालिका सुरू केली आहे. अरविंद केजरीवालांविरोधात शुक्रवारी (दि.18) आतापर्यंतचा सर्वात मोठा खुलासा करणार असल्याचा नवीन दावा कपिल मिश्रांनी केला आहे.  

 

कपिल मिश्रा यांनी ट्विटरद्वारे शुक्रवारी सकाळी 11 वाजता अरविंद केजरीवालांविरोधात सर्वात मोठा खुलासा करणार असल्याचा दावा केला आहे.  उद्याच्या खुलाशामुळे अरविंद केजरीवाल आणि हवाला ऑपरेटर्स यांच्यातील नेटवर्क जाहीर होतील असं त्यांनी ट्विट केलं आहे. यामागे मिश्रांनी केजरीवालांनी शेअर केलेल्या एका व्हिडीओचा उल्लेख केला आहे.

Biggest ever expose of @ArvindKejriwal tomorrow at 11 am. Thanks AK for RTing tht video. ऊपर वाला कुछ कमाल कर रहा है।

— Kapil Mishra (@KapilMishraAAP) May 18, 2017

 

मुख्यमंत्री अरविंद केजरीवाल यांनी गुरूवारी ट्विटरवर एक व्हिडीओ शेअर केला होता. हा व्हिडीओ एका खासगी चॅनलचा होता. या व्हिडीओत मुकेश शर्मा नावाच्या एका व्यक्तीने आम आदमी पक्षाला दोन कोटी रूपये देणगी दिल्याचा दावा केला होता. 

 

आज केजरीवालांनी व्हिडीओ व्हायरल केला, उद्या सकाळी केजरीवालांच्या या खोटारडेपणाचा पर्दाफाश करेल. कायदा माहित आहे, उद्या उत्तर देईल असं ट्विट त्यांनी केलं.

आज AK ने इस वीडियो को viral किया। कल सुबह 9 बजे करूँगा AK के इस सबसे बड़े झूठ का पर्दाफाश। IRS है, कानून जानते है। कल जवाब देंगे? pic.twitter.com/inRz8z37fy

— Kapil Mishra (@KapilMishraAAP) May 18, 2017

काय आहे आरोप-

दिल्लीतील मंत्री सत्येंद्र जैन यांनी दिल्लीचे मुख्यमंत्री अरविंद केजरीवाल यांना 2 कोटी रूपये दिले असा सनसनाटी आरोप करून कपिल मिश्रांनी दिल्लीच्या राजकारणात खळबळ उडवून दिली होती. जैन हे केजरीवालांच्या मंत्रिमंडळात मंत्री आहेत. दुसरीकडे आपने त्यांचे सर्व आरोप फेटाळले आहेत. यावर प्रतिक्रिया देताना सिसोदिया म्हणाले, कपिल मिश्रांनी केलेले आरोप अत्यंत खालच्या दर्जाचे असून हे सर्व आरोप निराधार आहे. प्रतिक्रिया देण्यासारखे हे आरोप नाही असे सिसोदिया यांनी म्हटले. त्यांनी केलेले आरोप हे पूर्णपणे बिनबुडाचे असून कोणत्याही आधाराशिवाय हे आरोप करण्यात आल्याचं ते म्हणाले. मात्र, मिश्रा यांच्या या आरोपांमुळे दिल्लीच्या राजकीय वर्तुळात खळबळ उडाली आहे. दिल्लीतील मंत्रिमंडळातून कपिल मिश्रा यांची हकालपट्टी करण्यात आली होती. कपिल मिश्रा यांनी दिल्लीचे नायब राज्यपाल अनिल बैजल यांची भेट घेतली. राज्यपालांच्या भेटीनंतर कपिल मिश्रा यांनी पत्रकारांशी संवाद साधताना केजरीवाल यांच्यावर आरोप केले. ‘परवा रात्री दिल्लीचे मंत्री सत्येंद्र जैन यांनी अरविंद केजरीवाल यांना माझ्यासमोर दोन कोटी रुपये दिले. हा प्रकार बघून मला रात्रभर झोप आली नाही’ असे कपिल मिश्रांनी सांगितले. मी हे पैसे कशासाठी दिले याची विचारणा केजरीवालांकडे केली. पण त्यांनी यावर ठोस उत्तर देणे टाळले असा दावा त्यांनी केला. तसेच मी भ्रष्टाचारविरोधी पथकाला पत्र लिहिल्यानं मला हटवण्यात आलं असं ते म्हणाले. याशिवाय केजरीवाल यांच्या एका नातेवाईकासाठी 50 कोटी रुपयांचं "डील" केल्याचं सत्येंद्र जैन यांनी आपल्याला सांगितलंय, असा गौप्यस्फोट त्यांनी केला. या गंभीर आरोपांमुळे दिल्लीच्या राजकीय वर्तुळात खळबळ उडाली आहे. हे पैसे कुठून आले आणि कशासाठी देण्यात आले याची चौकशी झाली पाहिजे अशी मागणीही त्यांनी केली आहे.