उत्तर प्रदेशातील बस्ती जिल्ह्यातून एक धक्कादायक घटना समोर आली आहे. गावातील दुकानातून विकत घेतलेला केक खाल्ल्याने एका कुटुंबाने आपला एकुलता एक मुलगा गमावला आहे. केक खाल्ल्यानंतर काही वेळातच तरुण आणि लहान मुलाची प्रकृती अचानक बिघडली. यामध्ये तरुणाचा मृत्यू झाला असून, चिमुकला सध्या मृत्यूशी झुंज देत आहे. या घटनेमुळे तरुणाच्या कुटुंबावर दुःखाचा डोंगर कोसळला आहे.
गौर पोलीस ठाण्याच्या हद्दीतील महुआडाबर गावात ही धक्कादायक घटना घडली. याप्रकरणी पोलिसांनी एफआयआर दाखल करून पुढील तपास सुरू केला आहे. गावातील अमन सिंह या तरुणाने शनिवारी संध्याकाळी स्थानिक किराणा दुकानातून ५-५ रुपयांचे दोन केक विकत घेतले होते. अमनने स्वतः एक केक खाल्ला आणि शेजारी राहणाऱ्या ३ वर्षीय ओमकारलाही केकचा तुकडा खायला दिला.
१८ वर्षीय अमन सिंहचा मृत्यू
केक खाल्ल्यानंतर अवघ्या काही मिनिटांतच दोघांच्याही पोटात खूप वेदना होऊ लागल्या आणि त्यांना उलट्या सुरू झाल्या. त्यांची प्रकृती बिघडताना पाहून कुटुंबीयांना धक्का बसला. दोघांनाही उपचारासाठी तातडीने स्थानिक रुग्णालयात नेण्यात आलं. मात्र उपचारादरम्यान १८ वर्षीय अमन सिंहचा मृत्यू झाला. तर चिमुकला ओमकार सध्या जिल्हा रुग्णालयात असून त्याच्यावर उपचार सुरू आहेत.
संपूर्ण गावात भीतीचं वातावरण
घटनेची माहिती मिळताच गौर पोलीस ठाण्याचं पथक घटनास्थळी पोहोचलं. पोलिसांनी अमनचा मृतदेह ताब्यात घेऊन शवविच्छेदनासाठी पाठवला आहे. या घटनेमुळे संपूर्ण गावात भीतीचे वातावरण आहे. गावातील दुकानांमध्ये विकल्या जाणाऱ्या निकृष्ट दर्जाच्या खाद्यपदार्थांची कडक तपासणी व्हावी, जेणेकरून भविष्यात अशा घटना टाळता येतील अशी मागणी ग्रामस्थांनी प्रशासनाकडे केली आहे.
घटनेने परिसरात खळबळ
या प्रकरणावर बोलताना डीएसपी स्वर्णिमा सिंह यांनी सांगितलं की, "गावातील एका दुकानातून घेतलेला केक खाल्ल्याने तरुणाचा मृत्यू झाल्याची प्राथमिक माहिती मिळाली आहे. शवविच्छेदन अहवाल आल्यानंतर पुढील कायदेशीर कारवाई केली जाईल. दुसऱ्या मुलावर डॉक्टरांच्या देखरेखीखाली उपचार सुरू आहेत." या घटनेने परिसरात एकच खळबळ उडाली आहे.