बंगळुरू: उड्डाण घेतल्यानंतर लगेचच एअर इंडिया एक्सप्रेसच्या विमानाच्या एका इंजिनला आग लागल्याची घटना शनिवारी रात्री घडली आहे. यामुळे विमानाची बंगळुरू विमानतळावर आपत्कालीन लँडिंग करण्यात आली. सुदैवाने या घटनेत कोणतीही जीवितहानी झालेली नाही.
मिळालेल्या माहितीनुसार, बंगळुरुहून कोचीला जाणाऱ्या विमानाच्या इंजिनला अचानक आग लागली. उड्डाणानंतर लगेचच घडलेल्या या घटनेनंतर क्रू मेंबर्सनी एटीसीला याबाबत माहिती दिली. यानंतर विमान परत बंगळुरू विमानतळावर सुरक्षितपणे उतरवण्यात आले. या विमानात 6 क्रु मेंबर्ससह 177 प्रवासी होते.
लँडिंगनंतर तात्काळ सर्व प्रवाशांना विमानातून सुखरूप खाली उतरवण्यात आले असून, या घटनेत कोणीही जखमी झाले नाही. यानंतर कंपनीने प्रवाशांसाठी पर्यायी विमानांची व्यवस्था केली. सध्या या घटनेची सकोल चौकशी केली जात आहे.