गुरुदासपूर (पंजाब) - पंजाबमधील गुरुदासपूर लोकसभा मतदारसंघातील भाजपाचे उमेदवार सनी देओल यांच्या वाहनाला अपघात झाला आहे. सध्या गुरुदासपूर येथे प्रचारात गुंतलेल्या सनी देवल यांचे वाहन सोमवारी सकाळी अपघातग्रस्त झाले. मात्र अपघात झाला तेव्हा सनी देओल हे वाहनात होते किंवा नव्हते त्याबाबत माहिती मिळालेली नाही. पंजाबमधील गुरुदासपूर येथून भाजपाने अभिनेते सनी देओल यांना रिंगणात उतरवले आहे. या मतदारसंघात निवडणुकीच्या शेवटच्या टप्प्यात मतदान होणार असून, सध्या सनी देओल हे गुरुदासपूरमध्ये जोरदार प्रचार करत आहेत. लोकसभा निवडणुकीच्या मध्यावरच सनी देओल हे भाजपामध्ये दाखल झाले होते. त्यानंतर त्यांना गुरुदासपूर लोकसभा मतदारसंघातून उमेदवारी जाहीर करण्यात आली होती. उमेदवारी जाहीर झाल्यापासूनच सनी देओल हे गुरुदासपूरमध्ये जोरदार प्रचार करत आहेत. तसेच एक मोठा रोड शो करून त्यांनी उमेदवारी अर्ज दाखल केला होता. सनी देओल यांच्या प्रचारासाठी त्यांचा धाकटा भाऊ बॉबी देओल आणि वडी धर्मेंद्र गुरुदासपूरमध्ये फिरत आहेत.
गुरुदासपूर येथे प्रचारादरम्यान सनी देओलच्या वाहनाला अपघात
By ऑनलाइन लोकमत | Updated: May 13, 2019 13:45 IST