- सुरेश एस. डुग्गरजम्मू : जम्मू-काश्मीरमधील अखनूर क्षेत्रात प्रत्यक्ष ताबा रेषेपासून जवळ असलेल्या गावात सोमवारी सकाळी लष्कराच्या रुग्णवाहिकेवर दहशतवाद्यांनी गोळीबार केला. हल्ला करणाऱ्या ३ दहशतवाद्यांचा सुरक्षा दलाने खात्मा केला. आणखी हल्लेखोरांच्या शोधासाठी रणगाड्यांची मदत घेतली आहे. दहशतवाद्यांच्या गोळीबारात सुदैवाने एकाही जवानाला इजा झाली नाही.
लष्कराच्या सूत्रांनी सांगितले की, जोगवान येथील शिवासन मंदिराजवळ लष्कराची रुग्णवाहिका व इतर वाहनांवर गोळीबार होताच सुरक्षा दलांनी या दहशतवाद्यांचा माग काढण्यास सुरुवात केली व त्यांना बट्टल भागामध्ये गाठले. सोमवारी पहाटे तीन दहशतवादी सीमेपलीकडून घुसखोरी करून काश्मीरच्या हद्दीत आले होते. तिथून ते एका मंदिरात शिरले व मोबाइलवर साथीदारांशी संपर्क साधण्याचा प्रयत्न करत होते. त्याच वेळी लष्करी ताफा जाताना रुग्णवाहिकेवर दहशतवाद्यांनी गोळीबार केला.
सीमावर्ती भागात सुरक्षा दलांना सतर्कता इशारा- जम्मू-काश्मीरमध्ये याआधी गंदरबल, बारामुल्ला येथे झालेल्या भ्याड दहशतवादी हल्ल्यांमुळे जम्मू, कठुआ, सांबा, पुंछ, राजौरी या सीमावर्ती भागात सुरक्षा दलांच्या जवानांना सतर्कतेचा इशारा देण्यात आला आहे.