२९... सारांश

प�

��लांचे रुंदीकरण करण्याची मागणी
नरखेड : तालुक्यातील अंतर्गत मार्गावरील पूल अरुंद व खोलगट आहेत. पावसाळ्यात त्या पुलावरून पाणी वाहत असल्याने वाहतूक ठप्प होते. शिवाय, गावांची तालुक्याशी संपर्कही तुटतो. त्यामळे या छोट्या पुलांची दुरुस्ती करून त्यांचे रुंदीकरण करण्याची मागणी तालुक्यातील सरपंचांनी केली आहे.
***
खड्ड्यांमुळे बळावली अपघाताची शक्यता
मेंढला : वडविहिरा - मेंढला - खराळा तसेच वडविहिरा - दावसा - थडीपवनी या दोन्ही मार्गावर ठिकठिकाणी खड्डे पडले आहेत. त्यामुळे वाहनचालकांना कसरत करावी लागत असून, अपघाताची शक्यता बळावली आहे. विद्यार्थ्यांना शाळेत जाण्यास त्रास सहन करावा लागत असल्याने या मार्गाची दुरुस्ती करण्याची मागणी ग्रामस्थांनी केली आहे.
***
ग्रामीण भागात कृत्रिम पाणीटंचाई
काटोल : तालुक्यातील ग्रामीण भागात मोठ्या प्रमाणात भारनियमन केले जात आहे. त्यामुळे पाण्याची टाकी भरण्यास विलंब होत असल्याने नियमित पाणीपुरवठा करणे शक्य होत नसल्याने गावांमध्ये कृत्रिम पाणीटंचाई निर्माण झाली आहे. त्यामुळे ग्रामीण भागातील दिवसाचे भारनियमन बंद करण्याची मागणी ग्रामस्थांनी केली आहे.
***
स्मशनभूमीत मूलभूत सुविधा तयार करा
सावरगाव : हल्ली परिसरातील गावांमधील स्मशानभूमीची दुरवस्था झाली आहे. तिथे पाणी, रस्ता यासह अन्य मूलभूत सुविधा नसल्याने नागरिकांना त्रास सहन करावा लागत आहे. काही ठिकाणचे दहन शेड मोडकळीस आले आहे. या स्मशानभूमीचे सर्वेक्षण करून तिथे मूलभूत सुविधांची निर्मिती करण्याची मागणी जोर धरत आहे.
***
सार्वजनिक विहिरी झाल्या निरुपयोगी
सावनेर : तालुक्यातील बहुतांश गावांमध्ये पाणीपुरवठा योजना असल्याने तेथील सार्वजनिक विहिरीत देखभाल व दुरुस्तीअभावी मोडकळीस आल्या आहेत. त्या विहिरी वापरात नसल्याने उन्हाळ्यातील पाणीटंचाई लक्षात घेता त्यांची दुरुस्ती करून त्यांचे रेन वॉटर हार्व्हेस्टिंगद्वारे पुनर्भरण करावे, अशी मागणी नागरिकांनी केली आहे.
***
संरक्षक कठडे लावण्याची मागणी
मांढळ : कुही तालुक्यातील अनेक अंतर्गत रोडवर पुलांचे बांधकाम करण्यात आले आहे. त्यातील बहुतांश पुलांचे संरक्षक कठडे तुटल्याने अपघात होण्याची शक्यता बळावली आहे. या पुलांचे सर्वेक्षण करून त्यावर संरक्षक कठड्यांची निर्मिती करावी, अशी मागणी वाहनचालकांनी केली आहे.
***