राज्यसभा निवडणुकीपूर्वी घोडेबाजार! काँग्रेस आमदारांना 'ब्लँक चेक'ची ऑफर; २ संशयित ताब्यात

ओडिशातील काँग्रेस आमदारांना फोडण्यासाठी पैशांची ऑफर देण्यात आल्याची माहिती समोर

Odisha Rajya Sabha Election: राज्यसभा निवडणुकीच्या तोंडावर देशाच्या राजकारणात घोडेबाजाराचा धक्कादायक प्रकार समोर आला आहे. ओडिशातील काँग्रेस आमदारांना फोडण्यासाठी बंगळुरू येथील एका रिसॉर्टमध्ये शिरून त्यांना कोट्यवधी रुपयांची लाच आणि चक्क ब्लँक चेक ऑफर केल्याचा खळबळजनक प्रकार उघडकीस आला. याप्रकरणी पोलिसांनी दोन जणांना ताब्यात घेतले असून राजकीय वर्तुळात मोठी खळबळ उडाली आहे.

नेमकं प्रकरण काय?

१६ मार्च रोजी होणाऱ्या राज्यसभा निवडणुकीत क्रॉस वोटिंग टाळण्यासाठी ओडिशामधील ९ पैकी ८ काँग्रेस आमदारांना बंगळुरूजवळील बिदादी येथील वंडरला रिसॉर्टमध्ये ठेवण्यात आले आहे. मात्र, रविवारी ओडिशातीलच चार अज्ञात व्यक्तींनी या रिसॉर्टमध्ये प्रवेश मिळवला. या व्यक्तींनी काँग्रेस आमदारांना भेटून एका विशिष्ट उमेदवाराला मतदान करण्यासाठी कोट्यवधी रुपयांचे आमिष दाखवल्याचा आरोप काँग्रेसने केला आहे.

'ब्लँक चेक' आणि जीवे मारण्याची धमकी

ओडिशा काँग्रेस विधीमंडळ पक्षाचे उपनेते अशोक कुमार दास यांनी बिदादी पोलीस ठाण्यात अधिकृत तक्रार दाखल केली आहे. तक्रारीनुसार चार व्यक्तींनी आमदारांना प्रत्येकी कोट्यवधी रुपये आणि कोरा चेक देऊन मत खरेदी करण्याचा प्रयत्न केला. जेव्हा काँग्रेस आमदारांनी ही ऑफर धुडकावून लावली, तेव्हा संबंधित व्यक्तींनी त्यांना शिवीगाळ केली. तसेच, ओडिशात परतलात तर जिवंत सोडणार नाही, अशी धमकी दिल्याचेही तक्रारीत म्हटले आहे.

दोन आरोपी पोलिसांच्या जाळ्यात

बंगळुरू दक्षिणचे पोलीस अधीक्षक आर. श्रीनिवास गौडा यांनी या घटनेला दुजोरा दिला आहे. त्यांनी सांगितले की, "आमदारांच्या तक्रारीवरून प्राथमिक चौकशी सुरू आहे. वीरेंद्र प्रसाद, सुरेश, अजित कुमार साहू आणि सिमाचल महाकुड या चौघांची नावे तक्रारीत आहेत. त्यापैकी दोन जणांना आम्ही ताब्यात घेतले आहे."

निवडणुकीचे समीकरण 

ओडिशामध्ये सत्ताधारी भाजप सरकारने राज्यसभेसाठी अतिरिक्त उमेदवार उभा केल्यामुळे काँग्रेसच्या गोटात धाकधूक होती. यामुळेच खबरदारीचा उपाय म्हणून १२ मार्च रोजी या आमदारांना कर्नाटकात हलवण्यात आले होते. हे आमदार आता मतदानाच्या काही तास आधीच भुवनेश्वरला परतणार आहेत.