Gold in Underwear: परदेशातून सोनं किंवा इतर वस्तुंची तस्करी करणारे नवनवीन पद्धती अवलंबतात. पण, बहुतांशवेळा त्यांचे प्रयत्न अपयशी ठरतात. असाच एक प्रकार जयपूर आंतरराष्ट्रीय विमानतळावर पाहायला मिळाला. शारजाहून विमानाने जयपूर आंतरराष्ट्रीय विमानतळावर आलेल्या एका व्यक्तीला डीआरआयच्या पथकाने अटक केली. डीआरआय अधिकाऱ्यांनी त्या व्यक्तीकडू कोट्यवधींचे सोने जप्त केले आहे.
जयपूर आंतरराष्ट्रीय विमानतळावर डीआरआय पथक प्रवाशांची तपासणी करत होते. यावेळी शारजाहातून आलेल्या एका व्यक्तीवर अधिकाऱ्यांना संशय आला. त्याची चौकशी केली असता, त्याने उडवाउडवीची उत्तरे दिली. यानंतर त्याची झाडाझडती घेण्यात आली. अधिकाऱ्यांना त्याच्या अंडरविअरमध्ये सोन्याची पेस्ट सापडली.
डीआरआयच्या पथकाने ती पेस्ट शुद्ध केली तेव्हा त्यात शुद्ध सोने सापडले. त्याचे वजन 2 किलो 700 ग्रॅम आहे. तस्कराने ते सोने पेस्टच्या स्वरूपात लपवून आणले होते. जप्त करण्यात आलेल्या सोन्याची बाजारात किंमत 1 कोटी 40 लाख रुपये असल्याचे सांगण्यात येते. डीआरआयच्या पथकाने आरोपी तरुणाला शुक्रवारी न्यायालयात हजर केले. अधिकारी पुढील तपास करत आहेत.