शनिवारी शहराचा पाणीपुरवठा बंद

शनिवारी शहराचा पाणीपुरवठा बंद

लोकमत न्यूज नेटवर्क
नाशिक : पाणीपुरवठा विषयक विविध कामांची दुरुस्ती करण्यासाठी येत्या शनिवारी (दि.१०) महावितरण कंपनीचा वीजपुरवठा बंद ठेवावा लागणार असल्याने नाशिकरोडसह संपूर्ण शहराचा पाणीपुरवठा बंद राहणार आहे.
गंगापूर धरण पंपिंग स्टेशन येथील महावितरण कंपनीची एक्स्प्रेस फिडर लाइनची देखभाल व दुरुस्ती, शिवाजीनगर जलशुद्धिकरण केंद्रास पाणीपुरवठा करणाऱ्या पंपसेट्सची व्हॉल्व्ह दुरुस्ती, ३३ केव्ही सबस्टेशनमधील दुरुस्ती, चेहेडी पंपिंग स्टेशन येथील उर्ध्ववाहिनीची दुरुस्ती, कालिका पंपिंग स्टेशनमधील नवीन पॅनल व केबलची जोडणी, कालिका जलकुंभ येथील गुरुत्ववाहिनीवरील व्हॉल्व्ह दुरुस्ती, गंगापूर डॅम पंपिंग स्टेशन येथील ९०० मिमी. व्यासाच्या रायझिंग मेनवरील व्हॉल्व्हची दुरुस्ती आदी कामे करण्यासाठी महावितरण कंपनीचा वीजपुरवठा सकाळी १० ते रात्री ७ वाजेपर्यंत बंद ठेवावा लागणार आहे. त्यामुळे येत्या शनिवारी संपूर्ण नाशिक शहर व नाशिकरोडचा दुपारचा व सायंकाळचा पाणीपुरवठा होणार नाही. रविवारी (दि. ११) सकाळचा पाणीपुरवठा कमी दाबाने होणार असल्याचे महापालिकेच्या पाणीपुरवठा विभागाच्या वतीने कळविण्यात आले आहे.