‘हेल्मेट’तपासणीसाठी सतर्कता अन‌् वाहतूककोंडीबाबत उदासीनता

शहरातील बहुतांश ठिकाणी विविध कारणांमुळे वाहतुकीचा खोळंबा होतोे. मात्र, याकडे शहर वाहतूक पोलिसांकडून कानाडोळा केला जातो. दररोज वडाळा रोडवरून वाहतूक करताना विविध अडथळ्यांचा सामना करावा लागतो. रस्त्यांवरील अतिक्रमण, तसेच लॉन्सचालकांकडे असलेल्या लग्नसोहळे आणि रस्त्यावर उभी राहणारी वाहने ही समस्या दिवसेंदिवस वडाळा रोडवर सिग्नलपासून थेट पांडवनगरीपर्यंत गंभीर बनत चालली आहे.

सीबीएस सिग्नल ते कॅनडा कॉर्नरपर्यंत टिळकवाडी-शरणपूर रोड रस्ता ‘नो पार्किंग-नो हॉल्टिंग झोन’ म्हणून घोषित केला आहे. मात्र, तो केवळ कागदावरच असल्याचे चित्र दिसून येते.

मुंबई नाका पोलीस ठाण्याच्या शेजारी वाहतुकीला नेहमीच अडथळा निर्माण होतो. सकाळी दहा वाजल्यापासून रात्री दहा वाजेपर्यंत कूल कॅब टॅक्सी थांब्याच्या वळणापासून मुंबई नाका पोलीस ठाण्याच्या शेजारी असलेल्या शहर बस निवारा शेडपर्यंत वाहतूककोंडी होते.

--इन्फो--

‘वाइन’ची नशा अन‌् वाहतुकीचा बोजवारा

मुंबई नाका येथील वाइनच्या दुकानात पॉश कारमधून मद्य खरेदीसाठी येणारी मंडळी सर्रासपणे रस्त्यांवर त्यांची वाहने उभी करतात. वाइनची हौस भागविण्यासाठी ग्राहकांच्या रीघमध्ये प्रदीर्घ वेळ उभे राहून मद्य खरेदी करतात. मात्र, तोपर्यंत वाहतुकीचा रस्त्यावर बोजवारा उडालेला असतो. हा सर्व प्रकार मुंबई नाका पोलीस ठाण्याशेजारी घडत नित्यनेमाने घडत आहे. याकडे ‘खाकी’ किंवा ‘पांढऱ्या’ वर्दीतील कोणतेही पोलीस लक्ष देत नसल्याने सर्वसामान्य नाशिककरांमध्ये संताप व्यक्त होत आहे.

---कोट--

शहरात दुचाकीवरून ट्रीपल सीट प्रवास, मोबाइलवर बोलणे, विरुद्ध बाजूने जाणे, नो-एण्ट्रीमध्ये घुसखोरी आणि रॅश ड्रायव्हिंग करणाऱ्यांची हेल्मेट तपासणी या प्रकारे कारवाईचे आदेश वाहतूक पोलिसांना दिले आहेत. महामार्गावर ओव्हरस्पीड, सीटबेल्ट, हेल्मेट तपासणी मात्र नियमितपणे करण्याच्या सुचना देण्यात आल्या आहेत. वाहतूककोंडी सोडविण्यासाठी वेळोवेळी सूचना बिनतारी संदेश यंत्रणेवरून दिल्या जातात.

- पौर्णिमा चौगुले-श्रींगी, उपायुक्त शहर वाहतूक शाखा