त्र्यंबकेश्वर व्हीआयपी दर्शन पासच्या घोटाळ्याचा संशय, लेजरबुकसह सीसीटीव्ही फुटेजही ताब्यात 

देवस्थानकडून तीन महिन्यांचे सीसीटीव्ही फुटेज आणि लेजरसह अन्य दस्तावेज मागवल्याने संबंधित अडचणीत येण्याची चिन्हे आहेत.

नाशिक : त्र्यंबकेश्वरमंदिरात एका भाविकाला अडवून मारहाण करण्याचा प्रकार विश्वस्त मंडळाला भोवण्याची चिन्हे आहेत. या प्रकरणात चौकशी अधिकाऱ्यांनी भाविकाला दर्शनापासून अडवणे म्हणजे कोणत्याही देवस्थानमध्ये जाण्यापासून अटकाव करण्याचा प्रकार आहे. तो भारतीय संविधानाच्या कलम १५ चे उल्लंघन असल्याच्या दिशेने चौकशी सुरू केली आहे. 

विशेष म्हणजे भाविक ज्या अन्य भाविकांच्या मागे जात होता, त्यातील सर्वानी व्हीआयपी दर्शन पास घेतला होता का आणि एकच पास काढून किंवा न काढताही देवस्थानशी संबंधित किंवा अन्य घटकांनी परस्पर किती प्रवेश दिले याची चौकशी सुरू केली आहे. त्यासाठी देवस्थानकडून तीन महिन्यांचे सीसीटीव्ही फुटेज आणि लेजरसह अन्य दस्तावेज मागवल्याने संबंधित अडचणीत येण्याची चिन्हे आहेत.

बारा ज्योर्तिलिंगांपैकी एक त्र्यंबकेश्वर महादेव मंदिरात भाविकांची प्रचंड गर्दी असते. ज्यांना दर्शन घेऊन परतण्याची घाई आहे त्यांच्यासाठी व्हीआयपी म्हणजेच सशुल्क दर्शन व्यवस्था आहे. सूत्रांनी दिलेल्या माहितीनुसार १ मार्च रोजी एका भाविकाला सुरक्षा रक्षकांनी मारहाण केल्याचा व्हिडिओ व्हायरल झाला होता. 

त्यानंतर पोलिसांनी तक्रार दाखल करून चौकशी सुरू केली असली शासनाने उपविभागीय दंडाधिकारी डॉ. जी. व्ही. एस. पवनदत्ता यांच्यामार्फत चौकशी सुरू केली आहे. त्यांनी या घटनेची चौकशी करताना दोन प्रमुख मुद्दे चौकशीच्या अग्रस्थानी घेतले आहेत, असे समजते. हा भाविक दर्शनासाठी जात असताना काही भाविक वेगळ्या रांगेने पुढे गेले, त्यामुळे हीच रांग असावी म्हणून तो तेथे गेला, परंतु सुरक्षा रक्षकांनी मारहाण केली. 

समजा वेगळे जाणारे भाविक हे सशुल्क दर्शनाचा पास घेऊन जात असतील तर त्यांच्यासाठी वेगळी रांग आणि अन्य भाविकांना जाण्यासाठी वेगळी रांग असा कोणत्याही भाषेतील फलक तेथे नव्हता. ज्याला मारहाण झाली तो भाविक हरियाणी होता, त्यामुळे त्याला कळेल असा फलकच नव्हता.

साहजिकच कोणत्याही कारणाशिवाय अशाप्रकारे भाविकांना धर्मस्थळातून रोखणे हा भारतीय संविधानांतील कलम १४ चा भंग आहे का, या दृष्टीने ते तपास करीत असल्याचे खात्रीलायक वृत्त आहे.

चौकशीत अनेक प्रकार उघडकीस येण्याची शक्यता

त्र्यंबकेश्वर देवस्थानने सशुल्क दर्शन सेवा ठेवली असली तरी देवस्थानच्या कॅमेऱ्यात त्याच दिवशी अनेक जण रांगेत जात होते. म्हणजे सर्वांनी दर्शन पास घेतले होते काय याची तपासणी केली जात असल्याचे समजते.

मंदिराच्या विश्वस्तांपासून महसूल, पोलिस अधिकारी, पुजारी वगैरे अनेक जण आपल्याबरोबर अनेकांना एकाच वेळी घेऊन जात आहेत. मग, त्याची पास काढल्याची नोंद आहे का, नसेल तर पासमधून मिळालेले उत्पन्न बुडाल्याने त्याला जबाबदार कोण असाही प्रश्न निर्माण झाला आहे.

चौकशी अधिकाऱ्यांनी विश्वस्तांकडून तीन महिन्याचे सीसीटीव्ही कॅमेरे, लेझर बुक मागवल्याने आता चौकशीत बरेच प्रकार उघडकीस येण्याची शक्यता आहे.