दरेवाडीतील महिलांच्या डोक्यावरील हंडा उतरणार

सर्वतीर्थ टाकेद : इगतपुरी तालुक्यातील ग्रामपंचायत काळुस्ते येथील दरेवाडीतील महिलांच्या डोक्यावरील हंडा कायमचा उतरणार आहे. अठरा विश्व दारिद्र्य, रोजचे ...

ठळक मुद्देकाळुस्ते येथे स्वदेश फाउंडेशनकडून पाणीपुरवठा योजनेचे भूमिपूजन

सर्वतीर्थ टाकेद : इगतपुरी तालुक्यातील ग्रामपंचायत काळुस्ते येथील दरेवाडीतील महिलांच्या डोक्यावरील हंडा कायमचा उतरणार आहे. अठरा विश्व दारिद्र्य, रोजचे जीवनमान हे मोलमजुरीवरच जगत आलेल्या व कायम कठीण परिश्रम हे नशिबात लिहून ठेवलेल्या अशा हलाखीच्या परिस्थितीत आपले जीवनमान जगत असलेल्या दरेवाडीतील ग्रामस्थांनी एकत्र येत भावी पिढीच्या उज्ज्वल भविष्यासाठी स्वदेश फाउंडेशन व गाव विकास समितीच्या उपस्थितीत दरेवाडीत नवीन पाणीपुरवठा योजनेच्या कामाचे भूमिपूजन करण्यात आले.

धारणांच्या तालुक्यात विविध खेडेगावातील महिलांना पिण्याच्या पाण्यासाठी उन्हा तान्हात पायपीट करत वण वण करत फिरावे लागते ही मोठी शोकांतिका आहे. धरण उशाला अन कोरड घशाला अशी परिस्थिती आदिवासी दुर्गम भागात बघावयास मिळते आहे. याच परिस्थितीला बदलविण्यासाठी स्वदेश फाउंडेशनने पुढे पाऊल टाकत ग्रामस्थांना एकत्र करत अखेर काळुस्ते येथील दरेवाडीतील महिलांच्या डोक्यावरील हंडा उतरविण्याचा संकल्प केला आहे. दरेवाडीत स्वदेश फाउंडेशनकडून नुकतेच पाणीपुरवठा योजनेच्या कामाचे भूमिपूजन करण्यात आले आहे.
यावेळी काळुस्ते गावचे लोकनियुक्त महिला सरपंच वनिता गवारी, ग्रामपंचायत सदस्य अनिरुद्ध घारे व दरेवाडी येथील ज्येष्ठ नागरिक व महिला तसेच स्वदेश मित्र आनंद बाबा पुराणे, के. ए. ग्रुपचे अध्यक्ष संदीप गवारी, उपाध्यक्ष राजेंद्र घारे, गोरख घारे, प्रकाश घारे, दादू गावंडा, राजू भगत, देवराम गावंडा यांच्यासह अंगणवाडी सेविका, स्वदेश फाउंडेशनचे मार्गदर्शक गणेश थोरात व दरेवाडी येथील ग्रामस्थ, नागरिक तरुण, महिला आदी उपस्थित होते.