Sudhakar Badgujar BJP: सुधाकर बडगुजर यांची ठाकरेंच्या शिवसेनेतून तडकाफडकी हकालपट्टी करण्यात आली. त्यांच्या हकालपट्टीनंतर भाजपचे प्रदेशाध्यक्ष चंद्रशेखर बावनकुळे यांनी भाजपचे दरवाजे खुले असल्याचे सांगितले. भाजपनेच गंभीर आरोप केलेले बडगुजर आता भाजपत जाणार का? अशी चर्चा सुरू झाली. त्यांना पक्षात घेऊन नये म्हणून भाजपचे नाशिकमधील आमदार आणि माजी नगरसेवकांनी थेट मुख्यमंत्री देवेंद्र फडणवीस यांचीच भेट घेतली. काय घडलं या भेटीत?
'लोकमत'चं WhatsApp चॅनल फॉलो करा!
विविध घोटाळे व वेगवेगळ्या प्रकारच्या २९ गुन्ह्यांची कुंडली सादर करीत सुधाकर बडगुजर यांना भाजपात घेऊ नये, या मागणीसाठी आमदार सीमा हिरे यांच्यासह १४ माजी नगरसेवक आणि डझनभर पदाधिकाऱ्यांनी मंगळवारी मुंबईत मुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे यांची भेट घेतली. त्यांना पक्षात घेण्यास तीव्र विरोध केला. असा प्रकार असेल तर प्रवेशासंदर्भात नक्कीच विचार करू, असे आश्वासन बावनकुळे यांनी शिष्टमंडळास दिले.
सुधाकर बडगुजर भाजपच्या वाटेवर?
ठाकरेंच्या शिवसेनेतून हकालपट्टी केल्यानंतर बडगुजर यांनी भाजप प्रवेशासाठी प्रयत्न चालविले असून, स्थानिक नेत्यांची त्यांनी भेट घेतली होती. तत्पूर्वी मुख्यमंत्री नाशिकमध्ये आले असता बडगुजर यांनी त्यांचे स्वागत केले होते.
बडगुजरांच्या गुन्ह्यांची कुंडली
एकीकडे बडगुजर यांचा प्रवेश घेण्यासाठी भेटीगाठी घेण्याचा सपाटा सुरू असताना त्यांच्याविरोधात भाजपमधील निष्ठावंत आक्रमक झाले आहेत. भाजपच्या नेत्यांसह संघानेही श्रेष्ठींना आपले मत कळवीत बडगुजर यांच्या प्रवेशास विरोध दर्शवला असताना गरम वातावरणातच आमदार सीमा हिरे यांच्यासह भाजपच्या आजी माजी लोकप्रतिनिधींनी मुंबईत बावनकुळे यांची भेट घेत बडगुजर यांच्यावरील गुन्ह्यांची कुंडलीच बावनकुळे यांना सादर केली.
फडणवीसांसह तीन नेत्यांची घेतली भेट
बडगुजर यांनी सीमा हिरे यांच्या विरोधात विधानसभा निवडणूक लढवली होती. त्यावेळी त्यांनी भाजपतील काही पदाधिकारी यांच्यावर टीकादेखील केली असल्याचे हिरे यांनी नेत्यांच्या कानावर घातले आहे. आमदार हिरे यांनी नाशिक पश्चिम मतदार संघातील १४ माजी नगरसेवक, चार मंडल अध्यक्ष तसेच पदाधिकाऱ्यांसह मुख्यमंत्री देवेंद्र फडणवीस, रवींद्र चव्हाण, बावनकुळे यांची भेट घेत बडगुजर यांना पक्षात प्रवेश देऊ नये, अशी मागणी केली आहे.
वाचा >>नितेश राणे यांना ‘बाप’ माणसाने दिली समज; नारायण राणे म्हणाले, मी नितेशला बोललो...
पक्षाची ताकद मतदार संघासह शहरामध्ये चांगली असून, जास्त नगरसेवक निवडून आणण्याचा प्रयत्न केला जाणार असल्याचे हिरे यांनी नेत्यांना सांगितले. आमदारासह माजी नगरसेवक व पदाधिकाऱ्यांनी नेत्यांची भेट घेतल्यानंतर आता बडगुजर यांना भाजपात प्रवेश दिला जाणार का, याबाबत आता उत्सुकता शिगेला लागली आहे.
या पदाधिकाऱ्यांचा विरोध
आमदार हिरे यांच्यासह माजी नगरसेवक मुकेश शहाणे, राकेश दोंदे, सतीश सोनवणे, भगवान दोंदे, श्याम बडोदे, प्रतिभा पवार, कावेरी घुगे, भाग्यश्री ढोमसे, छाया देवांग, अलका अहिरे, पुष्पा आव्हाड, दीपाली कुलकर्णी, सुप्रिया खोडे, मंडल अध्यक्ष डॉ. वैभव महाले, नारायण जाधव, जितेंद्र चोरडिया, राहुल गणोरे, सोनाली ठाकरे, सागर शेलार, प्रदेश पदाधिकारी प्रदीप पेशकर व रामहरी संभेराव यांनी विरोध केला.
सुधाकर बडगुजर काय बोलले?
उद्धव ठाकरे गटातून माझी हकालपट्टी झाली, इतपत जगजाहीर आहे. मात्र, त्यानंतर प्रवेश घेण्यासाठी मी भाजपकडे अथवा भाजपच्या नेत्यांकडे कोणत्याही प्रकारे प्रयत्न केलेला नाही, असे असताना माझ्या न होणाऱ्या प्रवेशाला होणारा विरोध हास्यास्पद आहे, असे सुधाकर बडगुजर या सगळ्या घटनाक्रमावर म्हणाले.