सिन्नरला शेतकऱ्यांवरील हल्ल्याचा मनसेतर्फे निषेध

दिल्ली येथे लोकशाही मार्गाने आंदोलन करणा-या शेतक-यांवर केंद्र सरकारने केलेल्या अत्याचाराचा सिन्नरला महाराष्ट्र नवनिर्माण सेनेच्या वतीने निषेध करण्यात आला. मनसेचे तालुकाध्यक्ष विलास सांगळे यांच्या नेतृत्वाखाली नायब तहसीलदार दत्ता जाधव यांना निषेधाचे निवेदन देण्यात आले.

कृषीप्रधान भारत देशात अशा प्रकारे शेतक-यांची आंदोलने दडपण्याचे आणि ठोकशाही पध्दतीने शेतकºयांवर अत्याचार करण्याचे प्रयत्न केंद्र शासनाकडून सुरु असल्याचा आरोप निवेदनात करण्यात आला आहे. दिल्लीत शेतक-यांच्या मोर्चावर लाठीमार, अश्रूधूराचा वापर करून अनेक शेतक-यांना जखमी केले असल्याचेही निवेदनात म्हटले आहे. शासनाकडून लोकशाही मार्गाने केली जाणारी आंदोलने दडपली जाणार असतील तर शेतक-यांनी न्याय मागायचा कुणाकडे, असा प्रश्न करत मनसेच्या वतीने या कृत्याचा निषेध नोंदवण्यात आला. मनसेच्या पदाधिका-यांनी नायब तहसीलदार जाधव यांना निवेदन दिले. यावेळी शहराध्यक्ष निखिल लहामगे, संतोष लोंढे, एकनाथ दिघे, संतोष गांजवे, भिवाजी शिंदे, धनंजय बोडके, सागर बेनके, स्वप्नील आव्हाड, गणेश सांगळे, श्रीकांत पवार आदींसह कार्यकर्ते उपस्थित होते.