घोटी : लग्नाच्या पूर्वतयारीसाठी बाहेरगावी गेलेल्या विवाहित महिलेवर गावातीलच नात्याने पुतण्या लागणाऱ्या युवकाने बलात्कार केल्याची घटना मांजरगाव परिसरात घडली आहे. याबाबत घोटी पोलीस ठाण्यात गुन्हा दाखल करण्यात आला असून, संबंधित युवकाला अटक करण्यात आली आहे.
याबाबत वृत्त असे की, शेणवड बु. (ता. इगतपुरी) येथील कुटुंब आपल्या नातेवाईकाच्या लग्नाच्या पूर्वतयारीसाठी गुरुवारी (दि.२४) सायंकाळी मांजरगाव येथे गेले होते. अशातच गावातील नात्याने पुतण्या लागणाऱ्या संशयित किरण वसंत दिवटे (वय २२, रा. शेणवड बु.) याने नात्याने लागणाऱ्या काकूस नाना दारू पिऊन तिकडे अंधारात पडला आहे, असे सांगून तिला नाल्याकडे घेऊन गेला. यावेळी अंधाराचा फायदा घेत त्याने विवाहितेला नाल्यात ओढाताण करत नेले व जिवे ठार मारण्याची धमकी देत तिच्यावर बळजबरीने लैंगिक अत्याचार केला. दरम्यान, आपली कशी तरी सुटका करून घेत ही महिला धावत पळत आपल्या नातेवाईकांच्या घरी पोहोचली आणि घडलेला प्रकार कथन केला. यावर तातडीने संबंधितांनी पोलीस ठाण्यात धाव घेत या युवकावर गुन्हा दाखल केला. घोटी पोलीस ठाण्याचे सहायक निरीक्षक दिलीप खेडकर यांच्या मार्गदर्शनाखाली उपनिरीक्षक संजय कवडे, हवालदार शीतल गायकवाड, अमोल केदारे यांनी तातडीने संशयित आरोपीस ताब्यात घेत अटक केली.