सातपूर : सातपूर औद्योगिक वसाहतीतील सिकॉफ फ्लॅटेडजवळ चहा पिऊन रस्ता ओलांडत असताना भरधाव दुचाकीने दिलेल्या जोरदार धडकेत ४२ वर्षीय व्यक्ती जागेवर ठार झाल्याची घटना घडली आहे. मृत व्यक्तीचे नाव रामचंद्र नानकू जांबेकर असून, तो हमालीचे काम करीत होता. त्याला धडक दिल्यानंतर अज्ञात दुचाकीचालक फरार झाला असून, सातपूर पोलीस ठाण्यात त्याच्याविरोधात गुन्हा दाखल करण्यात आला आहे.
सातपूर एमआयडीसीमधील सिकॉफ फ्लॅटेड वसाहतीत एका कंपनीत सिमेंट गोण्या पोहोचविण्यासाठी गेलेला हमाल रामचंद्र नानकू जांबेकर (रा. मालधक्का रोड, देवळाली गाव) हा चालकाबरोबर चहा पिण्यासाठी टपरीवर गेला होता. चहा पिऊन रस्ता ओलांडत असताना महिंद्र अँड महिंद्र कंपनीकडे जाणाऱ्या अज्ञात दुचाकीस्वाराने भरधाव दुचाकी चालवून जांभेकर यास जोरदार धडक दिली. ही धडक एवढी जोरदार होती की, त्यात जांभेकर डोक्याला मार लागल्याने गंभीर जखमी झाला. चालक विजय सिद्धार्थ घोडे यांनी औषधोपचारासाठी त्याला रुग्णालयात दाखल केले. मात्र, डॉक्टरांनी त्याला मृत घोषित केले. याबाबत चालक विजय घोडे यांनी सातपूर पोलीस ठाण्यात अज्ञात दुचाकीस्वाराच्या विरोधात तक्रार दाखल केली असून, पोलीस उपनिरीक्षक सुखदेव काळे पुढील तपास करीत आहेत.