निवडणुका संपताच पेट्रोल,डिझेलच्या दरात वाढ

नाशिक : देशातील पश्चिम बंगाल, तामिळनाडू, केरळ, आसाम, पाँडिचेरी या पाच राज्यांमधील निवडणूक संपताच पेट्रोलियम कंपन्यांनी ग्राहकांना इंधन दरवाढीचा झटका दिला आहे. तेल कंपन्यांनी केलेल्या भाववाढीमुळे मंगळवारी नाशिक शहरात (दि ४) पेट्रोल २४ पैसे आणि डिझेल २८ पैसे महागले आहे. या दरवाढीने नाशकात एक लिटर पेट्रोलचा भाव ९७.२४ रुपये झाला आहे, तर डिझेल ८७.१० रुपये झाले आहे.

पेट्रोल डिझेलच्या किमतीत ही वाढ जवळपास दोन महिन्यांनी झाली आहे. याआधी २७ फेब्रुवारीला पेट्रोल व डिझेलच्या दरात किंचित वाढ झाली होती. त्यानंतर काही पैशांची घसरण झाल्यानंतर आता दोन महिन्यांनी पुन्हा पेट्रोलच्या किमतीत वाढ झाली आहे. त्यामुळे सरकारकडून पेट्रोल,डिझेलचे दर नियंत्रणमुक्त केले असल्याचे सांगितले जात असले तरी निवडणुकीच्या तोंडावर पेट्रोल,डिझेलच्या भावात होणारी घसरण अथवा भाव स्थिरावणे आणि निवडणुकानंतर पुन्हा होणारी भाववाढ याचा सामान्य ग्राहकांकडून संबंध जोडला जात आहे. सरकार अप्रत्यक्षरीत्या तेल कंपन्यांवपर दबाव निर्माण करून इंधनाचे भाव नियंत्रित करून जनतेच्या डोळ्यात धूळफेक करीत असल्याचा आरोप आता पेट्रोल,डिझेलच्या ग्राहकांकडून केला जाऊ लागला आहे.

कोट-

पेट्रोल,डिझेलचे दर नियंत्रणमुक्त असल्याचे सांगितले जात असले तरी निवडणुकांच्या तोंडावरच भाव कमी होतात आणि निवडणुकानंतर तात्काळ पुन्हा भाववाढ सुरू होते, हे निश्चितच शंकास्पद आहे. यावरून सरकार अप्रत्यक्षरीत्या भाव नियंत्रित करीत असल्याची शक्यता नाकारता येत नाही.

- किरण टिळे, ग्राहक

--

पेट्रोल,डिझेल आणि गॅसच्या किमतीमध्ये निवडणुकांच्या तोंडावर होणारी कपात ही नागरिकांचे लक्ष महागाई‌वरून हटविण्यासाठीच केली जात असल्याची साशंकता आहे. दर नियंत्रणमुक्त असले तरी आंतरराष्ट्रीय बाजारात तेलाच्या किमती घसरूनही ग्राहकांना त्याचा फायदा मिळत नाही. मात्र निवडणुकांच्या तोंडावर भाववाढ थांबविली जाते अथवा तेलाच्या किमती कमी केल्या जातात, त्यामुळे इंधन तेलाचे दर निश्चित करणाऱ्या यंत्रणांवर सरकारचा दबाव असल्याची साशंकता निर्माण झाल्याशिवाय राहत नाही.

- सागर चव्हाण, ग्राहक

अशी आहे इंधन दरवाढ

महिना - पेट्रोल - डिझेल -

१ नोव्हेंबर - ८८.२१- ७६.१६

१ डिसेंबर - ८९.४४ - ७८.२०

१ जानेवारी - ९०.७६ - ७९.७१

१८ जानेवारी ९२.०२ - ८१.०८

१ फेब्रुवारी - ९३.२८ - ८२.४५

१७ फेब्रुवारी - ९६.६८ -८६.३४-

३० मार्च - ९७.३४ - ८६.९६

१५ एप्रिल - ९७.१८ - ८६.८२

४ मे - ९७.४२ - ८७.१०