नाशिक : पंधरा वर्षीय अल्पवयीन मुलीस विवाहाचे आमिष दाखवून कुमारी माता करणाऱ्या युवकाविरोधात इंदिरानगर पोलीस ठाण्यात बलात्कार तसेच लहान मुलांचे लैंगिक अपराधापासून संरक्षण (पोस्को) कायद्यान्वये गुन्हा दाखल करण्यात आला आहे़ सुनील रणपिसे (रा. साठेनगर, नाशिक) असे या संशयिताचे नाव असून, पोलीस त्याचा शोध घेत आहे़
पोलिसांनी दिलेल्या माहितीनुसार वडाळा-पाथर्डी रोड परिसरातील एका महाविद्यालयाच्या पाठीमागे मूळची औरंगाबाद मात्र काही महिन्यांसाठी नाशिकमध्ये राहण्यासाठी आलेल्या पंधरा वर्षीय मुलीला संशयित रणपिसे याने विवाहाचे आमिष दाखविले़ यानंतर मार्च २०१७ ते आॅक्टोबर २०१७ या कालावधीत या मुलीच्या घरी जाऊन तिच्यावर शारीरिक अत्याचार केला़ यानंतर संशयिताने या मुलीच्या घरी येणे बंद केले़ या मुलीस तिच्या मामाने औरंगाबाद येथे आणल्यानंतर पोटात दुखत असल्याने रुग्णालयात दाखल केले असता ती गर्भवती असल्याचे समोर आले़ यानंतर काही दिवसांनी या मुलीने एका मुलीला जन्म दिला़
या घटनेनंतर संबंधित मुलीने औरंगाबादच्या पुंडलिकनगर पोलीस ठाण्यात संशयित रणपिसे विरोधात फिर्याद दिली़ मात्र हा गुन्हा इंदिरानगर पोलीस ठाण्याच्या हद्दीत घडल्याने तो तपासासाठी शून्य नंबरने वर्ग करण्यात आला आहे़ दरम्यान, या पीडित मुलीस सद्य:स्थितीत भारतीय समाज सेवा केंद्रात दाखल करण्यात आले आहे़