नाशिक : मुंबईला कामानिमित्त गेलेल्या इसमाच्या घरातील कपाटातून चोरट्यांनी दहा लाख रुपयांचे सोन्याचे दागिने चोरून नेल्याची घटना कॉलेजरोड परिसरात घडली आहे़ या प्रकरणी गंगापूर पोलीस ठाण्यात चोरीचा गुन्हा करण्यात आला असून घरात कामास असलेली मोलकरणीची पोलिसांनी चौकशी केली आहे़
गंगापूर पोलिसांनी दिलेल्या माहितीनुसार कॉलेजरोडवरील डिसूझा कॉलनीतील श्रीजीपार्कमध्ये रविंद्र पाटील राहतात़ खासगी कामानिमित्त ते गुरुवारी (दि़८) मुंबईला गेल्यानंतर घरात केवळ त्यांची मुलगी व घरकामासाठी असलेली मोलकरीण अशा दोघीच होत्या़ तर पाटील हे कपाटाची चावी कपालाच विसरून गेले होते़ दोन दिवसांनी मुंबईहून परतल्यानंतर त्यांनी कपाटातील दागिण्यांची तपासणी केली असता त्यातील दहा लाख रुपयांचे सोन्याचे दागिने चोरी झाल्याचे लक्षात आले़
चोरट्यांनी पाटील यांच्या उघड्या घराच्या दरवाजातून प्रवेश करून कपाटातील चोरून नेले़ चोरी गेलेल्या दागिण्यांमध्ये ५५ ग्रॅम वजनाचे सोन्याचे १ लाख १० हजार रुपयाचे मंगळसूत्र, ४० ग्रॅम वजनाचा ८० हजार रुपये किमतीचा सोन्याचा पेशवाई नेकलेस, ८० ग्रॅम वजनाचे १ लाख ६० हजार रुपयांचे सोन्याचे गोटप्लेन जोड, ८० ग्रॅम वजनाचे १ लाख ६० हजार रुपयांचे सोन्याचे भरीव तोडे, ५० ग्रॅम वजनाची एक लाख रुपये किमतीची सोन्याची पेशवाई पाटली, ६५ ग्रॅम वजनाची १ लाख ३० हजार रुपये किमतीची सोन्याची अष्टपैलू बांगडी जोड, ७० ग्रॅम वजनाचे १ लाख ४० हजार रुपये किमतीची सोन्याची अष्टपैलू पाटली जोड असा ९ लाख ९० हजार रुपयांच्या दागिण्यांचा समावेश आहे़
या प्रकरणी रविंद्र पाटील यांच्या फिर्यादीवरून गंगापूर पोलिसांनी चोरीचा गुन्हा दाखल केला असून घरातील व्यक्ती व मोलकरीण यांची प्राथमिक चौकशी केली आहे़