नाशिक : भरधाव दुचाकीस्वाराने दिलेल्या धडकेत रस्ता ओलांडणाऱ्या वृद्धाचा मृत्यू झाल्याची घटना रविवारी (दि़१९) दुपारच्या सुमारास गंगापूर रोडवरील पाइपलाइन रोडवर घडली़ मोहनराव नारायण शंकनेर (८३, रा. राधिका प्राइड, गंगापूररोड, नाशिक) असे अपघातातमृत्यू झालेल्या वृद्धाचे नाव आहे.
पोलिसांनी दिलेल्या माहितीनुसार सातपूरच्या कामगारनगरमधील रहिवासी प्रसाद मोजाड यांचे सासरे मोहनराव शंकनेर हे दुपारी अडीच वाजेच्या सुमारास गंगापूर रोडवरील पाइपलाइन रोडवर असलेल्या मनीला फॉर्म हाउससमोरून रस्त्याने पायी जात होते. यावेळी रस्ता ओलांडत असलेल्या शंकनेर यांना पाइपलाइन रोडकडून रिलायन्स पेट्रोलपंपाकडे जाणाºया प्लेझर (एमएच ३८, के ३८११) दुचाकीस्वाराने जोरदार धडक दिली. यामध्ये त्यांच्या डोक्यास गंभीर दुखापत झाल्याने रुग्णालयात दाखल केले असता उपचारादरम्यान त्यांचा मृत्यू झाला़
दरम्यान, या अपघातानंतर दुचाकीचालक घटनास्थळावरून फरार झाला़ या प्रकरणी गंगापूर पोलीस ठाण्यात दुचाकीस्वाराच्या विरोधात गुन्हा दाखल करण्यात आला आहे.