नाशिक: एकीकडे मनसेप्रमुखराज ठाकरे हे पक्षसंघटनेला मजबूत करण्यासाठी वेळ देत असतानाच दुसरीकडे मात्र पक्षातील एका पदाधिकाऱ्याने महिला पदाधिकाऱ्याला रात्री-अपरात्री अश्लील मेसेज पाठवले. त्यामुळे या महिलेसह अन्य महिलांनी रविवारी (दि. २१) त्याला चांगला चोप दिला. त्यानंतर राज ठाकरे यांनी संबंधित पदाधिकाऱ्यावर कारवाई करण्याचे आदेश दिल्याचे समजते. राज ठाकरे हे तीन दिवसांपासून नाशिक दौऱ्यावर होते. दोन दिवस त्यांनी पदाधिकाऱ्यांशी चर्चा केल्यानंतर रविवारी (दि. २१) ते एक्स्प्रेस ईन हॉटेलमध्येच क्रेडाई आणि शेतकरी आघाडीच्या पदाधिकाऱ्यांशी चर्चा केली. त्यानंतर ते बांधकाम व्यावसायिकांशी चर्चा करत असताना हा प्रकार घडल्याचे वृत्त आहे.
नाशिक जिल्ह्यातील ग्रामीण भागात एका आघाडीचे काम करणाऱ्या पदाधिकाऱ्याने काही दिवसांपूर्वी एका महिलेस रात्री-अपरात्री मेसेज केले हेाते. त्यामुळे महिला आघाडीच्या महिला नाराज होत्याच; मात्र, त्यानंतरदेखील हा पदाधिकारी त्या ठिकाणी राज यांना भेटण्यासाठी आला होत; त्यामुळे महिला आघाडीच्या पदाधिकाऱ्यांनी त्याला जाब विचारून मग चांगलाच चोप दिल्याचे वृत्त आहे. अन्य काही पदाधिकाऱ्यांनी सारवासारव केल्यानंतर हा विषय राज ठाकरे यांच्याकडे गेला. त्यांनी पक्षाचे ज्येष्ठ नेते अशोक मुर्तडक आणि जिल्हाध्यक्ष अंकुश ठाकरे यांना तातडीने या विषयाची दखल घेऊन कारवाईचे आदेश दिल्याचे समजते.
संबंधित पदाधिकाऱ्याविषयी यापूर्वीदेखील तक्रारी झाल्यानंतर त्याचे पद काढून घेण्यात आले होते. त्यानंतर त्याला पुन्हा प्रमुखपदाची जबाबदारी देण्यात आली होती. त्यानंतर त्याने महिला पदाधिकाऱ्याला मेसेज केल्याने अन्य महिला संतप्त झाल्या होत्या. राज नाशिकमध्ये असतानाच त्यांनी या पदाधिकाऱ्याला धडा शिकवल्याचे समजते.