नायगावच्या सरपंचपदी मनीषा कदम

नायगाव ग्रामपंचायतीच्या १३ जागांसाठी झालेल्या सार्वत्रिक निवडणुकीत आपला पॅनल व विरोधी गटाच्या ग्रामविकास पॅनलमध्ये झालेल्या रंगतदार लढतीत आपला पॅनलने १३ पैकी ८ जागा मिळवत आघाडी घेतली होती. गुरुवारी (दि.२५) सरपंच, उपसरपंचपदाची निवडप्रक्रिया राबविण्यात आली. त्यात सरपंचपदासाठी आपला पॅनलकडून मनीषा समाधान कदम, तर ग्रामविकास पॅनलकडून सुनीता शंकर पवार यांनी उमेदवारी अर्ज दाखल केले, तर उपसरपंचपदासाठी आपला पॅनलचे भाऊसाहेब खंडेराव सांगळे यांना ग्रामविकास पॅनलच्या उत्तम दत्तात्रय पाबळे यांनी आव्हान दिले. चारही उमेदवारांचे अर्ज वैध ठरल्यानंतर माघारीसाठी दिलेल्या मुदतीत कोणाही उमेदवाराने माघार न घेतल्याने सरळ लढत झाली. यात आपला पॅनलच्या मनीषा कदम (८) यांनी सुनीता पवार (५) यांचा पराभव करून सरपंचपदाला, तर भाऊसाहेब सांगळे (८) यांनी ग्रामविकासच्या उत्तम पाबळे (५) यांचा पराभव करून उपसरपंचपदाला गवसणी घातली. याप्रसंगी पॅनलचे नेते भाऊसाहेब लोहकरे, विष्णु पाबळे, अंबादास जेजूरकर, किरण घिया, राजेंद्र बैरागी, एकनाथ जारकड, सलीम शेख, अशोक लोहकरे, संतोष सहाणे आदींसह नवनिर्वाचित सदस्य, कार्यकर्ते व ग्रामस्थ उपस्थित होते.

फोटो - २६ नायगाव सरपंच

सिन्नर तालुक्यातील नायगाव ग्रामपंचायतीच्या सरपंचपदी मनीषा कदम, तर उपसरपंचपदी भाऊसाहेब सांगळे विजयी झाल्या. त्याप्रसंगी जल्लोष करतांना ग्रामपंचायत सदस्य व कार्यकर्ते.