बिबट्या अन् वाघाची मावशी पडली विहिरीत

नांदूरशिंगोटे - वावी रस्त्यालगत कणकोरी शिवारात सदरची घटना घडली. सुरेगाव चौफुलीजवळ वाळिबा पुंजा सांगळे यांची शेतजमीन व विहिर आहेत. रविवारी (दि.५) सकाळी साडेसहा वाजेच्या सुमारास वस्तीवर राहणारे सुकदेव बुचकुल हे विहिरीवरील विद्युतपंप सुरू करण्यासाठी गेले असता विहिरीतून बिबट्याच्या डरकाळीचा आवाज येत होता. विहिरीच्या कपारीला बिबट्या बसलेला होता. बुचकुल यांनी शेतमालक गणेश सांगळे व माजी उपसरपंच रामनाथ सांगळे यांना घटनेची माहिती दिली. त्यानंतर सांगळे यांनी तातडीने वनविभागाच्या अधिकाऱ्यांना बिबट्या विहिरीत पडल्याची माहिती दिली. वनपरिक्षेत्र अधिकारी मनीषा जाधव, वनपरिमंडळ अधिकारी अनिल साळवे, सुधीर बोकडे आदींंसह कर्मचाऱ्याचे पथकाने घटनास्थळी धाव घेतली. विहिरीत पडलेल्या बिबट्याला पाहण्यासाठी परिसरातील नागरिकांनी मोठ्या प्रमाणात गर्दी केली होती. विहीर खोल असल्याने बिबट्याला बाहेर काढताना अडचणी लक्षात घेऊन वनविभागाच्या अधिकाऱ्यांनी पिंजरा आणला. विहिरीचा वरचा भाग मोकळा असल्याने वनविभागाने वावी येथून किरण पाटील यांची हायड्रोलिक क्रेन मागविली. त्यानंतर क्रेनच्या साहाय्याने दुपारी अकरा वाजेच्या सुमारास विहिरीत पिंजरा सोडला. पिंजरा सोडल्यानंतर काही काळ बिबट्या पिंजऱ्यापर्यंत येत होता व परत माघारी जात होता. त्यामुळे वनविभागाच्या कर्मचाऱ्यांची घालमेल होत होती. दुपारी साडेचार वाजेच्या सुमारास बिबट्या पिंजऱ्यात जेरबंद झाला आणि त्याला क्रेनच्या साहाय्याने सुखरूप बाहेर काढण्यात आले. हा बिबट्या पाच ते साडेपाच वर्षांचा असून नर जातीचा बिबट्या आहे. सिन्नर येथील वन उद्यानात बिबट्याची वैद्यकीय तपासणी करण्यात आली.

इन्फो

बिबट्या व मांजर दोघेही विहिरीत

विहिरीचा अंदाज न आल्याने व मांजरीचा पाठलाग करताना बिबट्या व मांजर हे दोघेही विहिरीत पडले असल्याचा अंदाज असून रात्रभर दोघांचा मुक्काम विहिरीत होता. दोघांनी परस्परविरोधी बाजूला कपारीचा आधार घेतला. दुपारी चार वाजेच्या सुमारास बिबट्याला काढल्यानंतर पुन्हा क्रेनद्वारे एका युवकाला विहिरीत पाठवून मांजरालाही वनविभागाने बाहेर काढले.

इन्फो

सांगळे यांची ५० ते ६० फूट विहीर असून त्यामध्ये २८ फुटांपर्यंत पाणी होती. पाण्याच्या वरतीच विहिरीची कपार असल्याने बिबट्या कपारीचा आडोसा घेत होता. २५ फुटापर्यंत विहिरीचे दगडी बांधकाम होते. विहिरीला वरच्या बाजूने कठडा नसल्याने मध्यरात्रीच्या सुमारास अंदाज न आल्याने बिबट्या विहिरीत पडला. वनविभागाचे पंधरा ते वीस कर्मचारी सकाळीच घटनास्थळी दाखल झाले होते. तब्बल आठ तासाच्या अथक परिश्रम घेतल्यानंतर बिबट्याला बाहेर काढण्यात यश आले.

फोटो - ०५ सिन्नर बिबट्या१/२

सिन्नर तालुक्यातील कणकोरी येथे विहिरीत पडलेल्या बिबट्याला रेस्क्यू ऑपरेशन करून बाहेर काढण्यात आले.

050921\05nsk_38_05092021_13.jpg~050921\05nsk_39_05092021_13.jpg

फोटो - ०५ सिन्नर बिबट्या १~फोटो - ०५ सिन्नर बिबट्या २