नाशिक : जिल्ह्यातील देवळा-नाशिक राज्यमार्गावरील रामेश्वर फाट्याजवळील दुर्गा हॉटेलसमोर शुक्रवारी (दि.१९) सायंकाळी कार आणि दुचाकीमध्ये झालेल्या भीषण अपघातात रामेश्वर (ता.देवळा) येथील एकाच कुटुंबातील तिघांचा जागीच, तर एका जखमीचा उपचारादरम्यान मृत्यू झाला. या अपघातात एकाच कुटुंबातील चौघांच्या मृत्यूने रामेश्वरसह परिसरात हळहळ व्यक्त होत आहे. अपघात इतका भीषण होता की यामध्ये दोन्ही वाहनांचा अक्षरशः चक्काचूर झाला.
याबाबत सविस्तर वृत्त असे की, रामेश्वर येथील ढेबूड मळा शिवारातील हिरे कुटुंबातील चौघे जण पिंपळगाव (वा.) येथून दुचाकीने (एमएच ४१ के ५६६१) शेतीच्या कामावरून घराकडे परतत होते. सायंकाळी साडेसहा वाजेच्या सुमारास देवळा-नाशिक राज्यमार्गावरील रामेश्वर फाट्याजवळील दुर्गा हॉटेलसमोरून भावडबारी घाटाच्या दिशेने जात असताना नाशिककडून येणाऱ्या कारने (एमएच ४३ एएल ३००९) दुचाकीला जोरात धडक दिली. या अपघातात हिरे कुटुंबातील गोपीनाथ साळूबा हिरे (वय ४२), मंगलबाई गोपीनाथ हिरे (वय ३५) या पती-पत्नीसह मुलगा गोरख गोपीनाथ हिरे (वय १६) हे जागीच ठार झाले, तर मुलगी जागृती गोपीनाथ हिरे (वय १८) ही गंभीर जखमी झाल्याने तिला देवळा ग्रामीण रुग्णालयात दाखल करण्यात आले. परंतु तिची अत्यवस्थ स्थिती पाहून तिला मालेगाव येथे पुढील उपचारासाठी पाठविण्यात आले. मालेगाव येथे उपचारादरम्यान तिचा मृत्यू झाला. देवळा ग्रामीण रुग्णालयात शनिवारी सकाळी शवविच्छेदन करण्यात येऊन त्यांच्यावर रामेश्वर येथे अंत्यसंस्कार केले जाणार आहेत. याबाबत देवळा पोलिसांत रात्री उशिरापर्यंत अपघाताचा गुन्हा दाखल करण्याचे काम सुरू होते.
इन्फो
शेतातून परतताना आघात
गोपीनाथ हिरे हे पिंपळगाव (वा) येथे वाट्याने शेती करत होते. तेथे त्यांनी कांदा लागवड केलेली होती. हे सर्व कुटुंब शेतात निंदणीचे काम करून सायंकाळी घरी परतत असताना काळाने संपूर्ण कुटुंबावर घाला घातला. एकाच कुटुंबावर आघात झाल्याने परिसरात हळहळ व्यक्त केली जात आहे.