लोकमत न्यूज नेटवर्क दिंडोरी (जि. नाशिक) : दिंडोरी मतदारसंघात महायुतीतील मित्रपक्षांचे आमदार प्रचारात सक्रिय होत नसल्याची तक्रार होत असतानाच दिंडोरी तालुक्यातील तिसगाव येथे मविआचे उमेदवार भास्कर भगरे यांच्या प्रचारसभेला विधानसभेचे उपाध्यक्ष व दिंडोरीचे अजित पवार गटाचे आमदार नरहरी झिरवाळ यांनी हजेरी लावली. त्यामुळे झिरवाळ यांच्या घरवापसीच्या चर्चेला उधाण आले आहे; तर, झिरवाळ यांनी आपण एका धार्मिक कार्यक्रमानिमित्त तेथे गेलो होतो, असे सांगत आपण महायुतीतच असल्याचे स्पष्ट केले आहे.
प्रचारसभेतील फोटोच व्हायरल झाल्याने चर्चांना उधाणn दिंडोरीत भाजपच्या विद्यमान खासदार व केंद्रीय राज्यमंत्री डॉ. भारती पवार व शरद पवार गटाचे भास्कर भगरे यांच्यात सरळ लढत होत आहे. n झिरवाळ यांनी भास्कर भगरे यांच्या प्रचारसभेला हजेरी लावल्याचे छायाचित्र सोशल मीडियावर व्हायरल झाल्यानंतर झिरवाळ यांच्या घरवापसीची जोरदार चर्चा सुरू झाली. भाजपकडूनही याची गंभीर दखल घेण्यात आल्याचे समजते.
आपण मारुती मंदिराच्या जीर्णोद्धार कार्यक्रमाला आधीपासूनच हजर होतो. त्यात तेथे भगरे यांची प्रचारसभा सुरू असल्याने गावकऱ्यांनी व्यासपीठावर बसण्याचा आग्रह धरला. तेथे आपण कोणतेही भाषण केले नाही. आपण महायुतीतच असून, गुरुवारी मी भाजप उमेदवार डॉ. भारती पवार यांच्या प्रचारात रात्री उशिरापर्यंत कार्यरत होतो. - नरहरी झिरवाळ