खुनाचा प्रयत्न केल्याप्रकरणी टोळक्याविरुद्ध गुन्हा

------

लोकमत न्यूज नेटवर्क

नाशिक : जुने नाशिकमधील वडाळा नाका भागात जुन्या भांडणाची कुरापत काढून एका २४ वर्षीय तरुणावर लोखंडी रॉडने टोळक्याने हल्ला चढवत गंभीर मारहाण करत जखमी केल्याची घटना घडली. याप्रकरणी भद्रकाली पोलीस ठाण्यात खुनाचा प्रयत्न केल्याचा गुन्हा दाखल करण्यात आला आहे. तसेच परस्परविरोधी तक्रारी पोलिसांकडे करण्यात आल्या आहेत.

वडाळा नाका भागातील कसाईवाडा वसाहतीमध्ये संध्याकाळी सात वाजण्याच्या सुमारास दोन गट समोरासमोर भिडले. संशयित परवेज उर्फ गब्बू निसार शेख (२१), आवेश निसार शेख, सुफियान उर्फ घारु निसार शेख, अरबाज सलीम शेख (२१, रा. चौक मंडई), मोईन इस्लाम शेख (१८, रा. काजीपुरा), यांच्यासह तिघा संशयित साथीदारांनी फिर्यादी मजहर अलाउद्दीन शेख (२४), अजम कुरेशी (दोघेही रा. कसाईवाडा) यांना मारहाण केल्याचे फिर्यादीत म्हटले आहे. लाकडी दंडुक्याने तसेच लोखंडी रॉडने त्यांच्यावर हल्ला करण्यात आला. या हल्ल्यात फिर्यादी गंभीर जखमी झाले. यावेळी हल्लेखोरांच्या टोळक्याने मारुती स्वीफ्ट कारचीही तोडफोड केल्याचे फिर्यादीत म्हटले आहे. याप्रकरणी संशयितांविरुद्ध खुनाचा गुन्हा दाखल करण्यात आला आहे.

पोलिसांनी परवेज, अरबाज, मोईन या तिघांनाही अटक केली आहे. तसेच आवेश शेख यांच्या फिर्यादीवरून संशयित मझहर कुरेशी, वसीम शेख उर्फ देशू, अजम कुरेशी, तन्वीर कुरेशी यांच्याविरोधातही मारहाणीचा गुन्हा दाखल करण्यात आला आहे.