बैलपोळ्यावर पुन्हा कोरोनाचे सावट ?

मानोरी : काही दिवसांवर येऊन ठेवलेल्या बैलपोळा सणासाठी मातीचे बैल तयार करण्याचे काम कुंभार व्यावसायिकांकडून अंतिम टप्प्यात आले आहे. गेल्या दोन वर्षांपासून बैलपोळा सणावर कोरोनाचे कोरोनाचे सावट असल्याने दरवर्षीच्या तुलनेत तसेच गतवर्षीच्या तुलनेतदेखील यंदा मातीपासून तयार केल्या जाणाऱ्या बैलजोड्यांची संख्या कमी प्रमाणात तयार करण्यात येणार असल्याची माहिती कुंभार व्यावसायिकांकडून देण्यात आली आहे.

मागील काही वर्षांच्या तुलनेत ग्रामीण भागात बोटावर मोजण्याइतक्यातच शेतकऱ्यांच्या दावणीला बैलजोडी बांधलेली असल्याचे दुर्मिळ वास्तव आढळून आले असून अनेक शेतकऱ्यांनी हौस म्हणूनदेखील आपल्या घरी दावणीला बैलजोडी बांधून ठेवली असल्याचे शेतकरी वर्गाकडून सांगण्यात येत आहे. वर्षभर शेतात राबराब काम करून बैलांप्रति कृतज्ञता व्यक्त करण्यासाठी पोळ्याला बैलांचे महत्त्व प्राप्त झाले आहे. ज्या शेतकऱ्यांकडे बैलजोडी नाही असे शेतकरी मातीपासून तयार करण्यात आलेल्या बैलजोडीला मान देत असतात.

दरम्यान, गेल्या दोन वर्षांपासून कुंभार व्यावसायिकांना मातीपासून बनविलेल्या बैलजोडीला बाजारात मागणी कमी झाल्याने आर्थिक नुकसान होत असल्याची खंत कुंभार व्यावसायिकांनी बोलून दाखवली आहे.

मातीच्या बैलजोडीस बाजारात मोठी मागणी राहील, या आशेने तयार केलेल्या बैलजोडीस कोरोनामुळे मागणी घटल्याने तयार केलेला हजारो रुपयांचा माल तसाच पडून असल्याने यंदा कमी प्रमाणात मातीचे बैलजोडी तयार करण्यात आले असल्याचे शरद गोरे यांनी सांगितले.

चौकट...

शासनाने अर्थसाहाय्य देण्याची मागणी

मातीपासून नवनवीन वस्तू तयार करून त्यांची विक्री करून अनेक कुंभार व्यावसायिक आपली दैनंदिन गुजराण करत असतात. गेल्या दोन वर्षांपासून कोरोनाने सर्व व्यवसाय ठप्प झाले होते. कुंभार व्यावसायिक नवरात्र, गणेशोत्सव, बैलपोळा सणासाठी मातीपासून मूर्ती तयार करणे, देवीच्या मूर्ती तयार करणे, बैलजोडी तयार करून आपला उदरनिर्वाह करत असतात. मात्र गेल्या दोन वर्षांपासून या सणांवर निर्बंध घातल्याने मोठ्या प्रमाणात मूर्ती तसेच बैल मागणीअभावी पडून असल्याने आर्थिक फटका बसला असून शासनाने आर्थिक साहाय्य करून मदत देण्याची मागणी कुंभार व्यावसायिकांनी केली आहे.