कोरोनाच्या वाढत्या संसर्गामुळे न्यायालयांच्या वेळेत बदल

सर्व न्यायाधीश दोन्ही सत्रात हजर राहतील मात्र कोर्टातील कर्मचारी पन्नास टक्के हजर राहतील. ज्यांचे काम चालणार असेल त्याच वकील व पक्षकारांना कोर्ट हॉलमध्ये बसता येईल तसेच एखादा पक्षकार किंवा वकील एखाद्या प्रकरणात हजर राहिला नाही तर त्याच्या विरोधात ऑर्डर केली जाणार नाही. मास्क, फिजिकल डिस्टन्सिंग व सॅनिटायझरचे सर्व नियम पाळावे लागणार आहेत. पहिल्या सत्रात पुरावा घेण्याचे काम प्राधान्याने होईल. दुसऱ्या सत्रात वकिलांचे युक्तिवाद व इतर कामे होतील. कामाशिवाय वकील व पक्षकार यांनी कोर्टात गर्दी करू नये असे परिपत्रक उच्च न्यायालय समन्वय समिती व न्यायाधीश यांनी सध्याची कोविडची परिस्थिती बघता काढले आहे. हे परिपत्रक महाराष्ट्रातील सर्व जिल्हा व तालुका न्यायालयांना लागू राहणार असल्याची माहिती नाशिक बार असोसिएशनचे अध्यक्ष नितीन ठाकरे यांनी दिली.