ब्राह्मणवाडे सरपंचाविरोधात अविश्वास ठराव मंजूर

ब्राह्मणवाडे सरपंचाविरोधात अविश्वास ठराव मंजूर

 नायगाव : सिन्नर तालुक्यातील ब्राह्मणवाडेच्या सरपंच सुनंदा तबाजी वाघ यांच्याविरोधात अविश्वास ठराव मंजूर करण्यात आला.
नायगाव खोऱ्यातील ब्राह्मण-वाडेच्या सरपंचपदी सुनंदा वाघ यांची गेल्या वर्षी निवड करण्यात आली होती. वाघ या पदाचा गैरवापर करतात. मनमानी कारभार करतात, विकासकामांत अडथळा निर्माण करतात, ग्रामपंचायत सदस्यांना विश्वास न घेता काम करतात. असे आरोप त्यांच्यावर करत आठ सदस्यांनी तहसीलदारांकडे त्यांच्या विरोधात अविश्वासाचा प्रस्ताव दाखल केला होता.
प्रस्तुत अविश्वास ठरावावर चर्चा करण्यासाठी व मतदान घेण्यासाठी तहसीलदार मनोजकुमार खैरनार यांच्या अध्यक्षतेखाली ग्रामपंचायत सदस्यांच्या विशेष बैठकीचे आयोजन करण्यात आले होते. या बैठकीस सरपंच सुनंदा वाघ गैरहजर राहिल्या. उर्वरित सर्व आठ ग्रामपंचायत सदस्यांनी अविश्वास ठरावाच्या बाजूने मतदान केले. त्यामुळे अविश्वास ठराव मंजूर झाल्याची घोषणा तहसीलदार खैरनार यांनी केली. उपसरपंच सुनील अर्जुन गिते, ग्रामपंचायत सदस्य भीमा गिते, संजय गिते, सुनील रामराजे, चंद्रभागा गिते, मंगल घुगे, शीतल रामराजे, मंदा माळी यांच्यासह ग्रामसेवक जी. आर. वटाणे उपस्थित होते. सरपंच व ग्रामपंचायत सदस्यांमध्ये मतभेद असल्याने अविश्वास प्रस्तावाकडे नायगाव खोऱ्याचे लक्ष लागून होते.
राहिले होते.
(वार्ताहर)