ठळक मुद्देशेतमाल विक्रीस आणताना कोरोना चाचणी बंधनकारक
येवला : येथील कृषि उत्पन्न बाजार समिती मुख्य आवार व अंदरसुल उपबाजार आवरावर सोमवार (दि.२४) पासून शेतमाल लिलाव पूर्ववत सुरू होत असल्याची माहिती मुख्य प्रशासक वसंत पवार यांनी दिली.जिल्हाधिकारी व जिल्हा उपनिबंधक यांच्याबरोबर झालेल्या बैठकीतील सूचनेप्रमाणे कोरोना काळात बाजार समितीचे लिलाव कामकाज पूर्ववत सुरू करणेसाठी सोमवारी (दि.२४) मुख्य आवार येवला येथे ५०० (ट्रॅक्टर) व उपबाजार अंदरसुल येथे ३०० (ट्रॅक्टर) कांदा लिलावासाठी ( फक्त ट्रॅक्टर) वाहनांची नोंदणी रविवार (दि.२३) मुख्य आवारासाठी तसेच उप बाजार अंदरसुलसाठी सकाळी ९ ते दुपारी १ वाजेपर्यंत करण्यात येणार आहे. मोबाईलवर नोंदणी केलेल्या शेतकऱ्यांनाच सोमवारी (दि. २४) बाजार समितीत प्रवेश दिला जाईल असे मुख्य प्रशासक पवार, सचिव कैलास व्यापारे व प्रशासकीय मंडळ सदस्यांनी कळविले आहे.