नाशिक : हेल्मेट सक्ती असो वा पेट्रोल पंप चालकांवर आत्महत्येस प्रवृत्त केल्याचा गुन्हा दाखल करण्याचा निर्णय, नेहमीच आपल्या निर्णयामुळे वादग्रस्त व चर्चेत राहणारे पोलीस आयुक्त दीपक पाण्डेय यांनी पाेलीस महासंचालकांकडे अकार्यकारी पदावर बदलीसाठी अर्ज केला आहे. खुद्द पाण्डेय यांनी याला दुजोरा दिला असला तरी बदलीमागे अन्य कोणतेही कारण नसून, व्यक्तिगत कारणांसाठी बदलीसाठी विनंती केल्याचे त्यांनी म्हटले आहे. दीपक पाण्डेय यांनी दोन वर्षांपूर्वी कोरोना काळात नाशिक पोलीस आयुक्तपदाची सूत्रे स्वीकारल्यानंतर कोरोना काळात जिल्हाधिकाऱ्यांनी घेतलेल्या निर्णयाला थेट विरोध करत जिल्हा प्रशासनाशी दोन हात करण्याची तयारी केली. त्यानंतर शहरातील अवैध दारू विक्री, मटका, जुगार अड्डे बंद करण्याचे काम पोलिसांचे नसल्याचे सांगून वाद वाढवून घेतला होता. तर हेल्मेट सक्तीच्या कामासाठी आरटीओकडे बोट दाखविले होते. या काळात गुन्हेगारांविरुद्ध कडक भूमिका घेत मोक्काचे हत्यार उपसले होते. याच दरम्यान, ‘भूमाफिया’ ही लघू चित्रफित प्रसिद्ध करून महसूल खात्याला आरोपीच्या पिंजऱ्यात उभे केले.
पेट्रोल पंपांवर पोलिसांची नेमणूक करून ‘नो हेल्मेट नो पेट्रोल’ अशी भूमिका घेतल्याने पेट्रोल पंपचालकांनी त्यांना थेट न्यायालयात खेचले होते. दरम्यानच्या काळात शहरातील गुन्हेगारीविषयी सत्ताधारी व विरोधी पक्षांकडून चौफेर टीका होताच पेट्रोल पंपांवरून पोलिसांना माघारी बोलावण्याची नामुष्की पोलीस आयुक्तांवर ओढवली होती. दरम्यानच्या काळात पोलीस चौक्यांमध्ये पोलिसांची दारू पार्टी रंगल्याची घटना घडल्यानंतर पाण्डेय यांनी शहरातील ६५ पोलीस चौक्या बेकायदेशीर ठरविल्या होत्या. दोन दिवसांपूर्वीच पोलीस आयुक्तांनी विनाहेल्मेट चालकांना पेट्रोल देणाऱ्या पेट्रोल पंप चालकांविरुद्ध आत्महत्येस प्रवृत्त केल्याचा गुन्हा दाखल करण्याचा इशारा दिला. तर नववर्षानिमित्त स्वागत यात्रा काढणाऱ्या सामाजिक संघटनांना परवानगी नाकारून रोष ओढवून घेतला होता. यामुळे पोलीस आयुक्तांविरोधात लोकप्रतिनिधींनी राज्य सरकारकडे तक्रारीही केल्या होत्या.