नाशिक : शालेय विद्यार्थी वाहतूक करणारी स्कूल व्हॅन आणि पिकअप यांच्यात अपघात होऊन चार विद्यार्थी जखमी झाल्याची घटना सोमवारी (दि.२६) सकाळी तपोवनातील दिगंबर आखाडा रस्त्यावर घडली आहे. मात्र या अपघाताबाबत आडगाव पोलिस ठाण्यात दुपारपर्यंत कोणताही गुन्हा दाखल नसल्याची माहिती आडगाव पोलिसांनी दिली आहे.
पोलिसांनी दिलेल्या माहितीनुसार, सोमवारी सकाळी एका शाळेतील विद्यार्थी वाहतूक करणारी स्कूल व्हॅन तपोवन रस्त्यावर असलेल्या दिगंबर आखाडा येथून जात असतांना समोरून भरघाव वेगात आलेल्या पिकअप चारचाकी वाहनाने धडक दिली त्यात पिकअप रस्त्याच्या बाजूला फेकली गेली या स्कूलव्हॅनमध्ये जवळपास दहा ते बारा विद्यार्थी बसलेले होते. अपघातात स्कुल व्हॅन मध्ये बसलेलेल्या विद्यार्थ्यांपैकी चार विद्यार्थ्यांना हाताला व पायाला किरकोळ दुखापत झाली आहे.
घटनेनंतर पोलिसांसह विद्यार्थी पालकांनी घटनास्थळी धाव घेतली.या अपघातात स्कुल व्हॅनचे नुकसान झाले आहे, मात्र या अपघात प्रकरणात आडगाव पोलिस ठाण्यात सायंकाळपर्यंत अपघाताची कोणतीही नोंद करण्यात आलेली नव्हती. दरम्यान, स्कुल व्हॅनमध्ये असलेले सर्व विद्यार्थी हे बिडी कामगार नगर भागातील असून तर पिकअप जेलरोड भागातील असल्याची माहिती समोर आली आहे.