प्रतापगड फाट्यावर अपघात; एक ठार

सुरगाणा : येथून जवळच असलेल्या प्रतापगड फाट्यावर पिकअप जीप व मोटरसायकल यांच्यात झालेल्या अपघातात दुचाकीचालक जागीच ठार, तर पाठीमागे बसलेले दोघे सख्खे भाऊ गंभीर जखमी झाले. हा अपघात सायंकाळी साडेपाच वाजेच्या दरम्यान घडला. मोटरसायकल वरील तिघे तालुक्यातील कोठुळे येथील राहणारे असून ते मोटारसायकल (क्र.एम.एच.१५ डीव्ही १७४७) ने सुरगाण्याकडून कोठुळे येथे जात असताना प्रतापगड फाट्यावर समोरून येत असलेल्या पिकअप वाहन (क्र.एम एच ४८ टी ८७२०)ला चालकाच्या बाजूने जोरदार धडक दिली. अपघातात मोटारसायकलचे पुढील चाक तुटून पडले. मोटरसायकल चालक भाऊराव परशुराम शेवरे (४१) यांच्या डोक्यात गंभीर मार लागल्याने ते जागीच ठार झाले. पाठीमागे बसलेले कृष्णा काशिराम पवार (३१) व सुरेश काशिराम पवार (४०) हे दोघे सख्खे भाऊ गंभीर जखमी झाले आहेत. त्यांना तातडीने सुरगाणा ग्रामीण रुग्णालयात दाखल करण्यात आले. त्यानंतर पुढील उपचारासाठी जिल्हा रुग्णालयात दाखल करण्यात आले आहे. पुढील तपास पोलीस करीत आहेत.