३१ प्रभाग झाले निश्चित

३१ प्रभाग झाले निश्चित

नाशिक : फेब्रुवारी २०१७ मध्ये होणाऱ्या महापालिका निवडणुकीसाठी तयार करण्यात आलेल्या प्रारूप प्रभाग रचनेचा प्रस्ताव विभागीय आयुक्तांच्या अध्यक्षतेखालील त्रिसदस्यीय समितीमार्फत सोमवारी (दि.१२) राज्य निवडणूक आयोगाला सादर करण्यात आला. दरम्यान, मनपा निवडणुकीसाठी ३१ प्रभाग निश्चित करण्यात आले असून, १२२ सदस्यसंख्या कायम राहणार असल्याची माहिती महापालिका आयुक्त अभिषेक कृष्ण यांनी दिल्याने प्रभाग आणि सदस्यसंख्येच्या चर्चेला पूर्णविराम मिळाला आहे.
महापालिका निवडणुकीसाठी कोअर कमिटीमार्फत प्रारूप प्रभाग रचनेचा प्रस्ताव तयार करून तो विभागीय आयुक्तांना सादर करण्यात आला होता. विभागीय आयुक्त, जिल्हाधिकारी आणि महापालिका आयुक्त यांच्या त्रिसदस्यीय समितीने सदर प्रस्तावाची तपासणी करत महापालिकेने पाठविलेल्या प्रस्तावावर शिक्कामोर्तब केले. त्यानंतर निवडणूक आयोगाच्या निर्देशानुसार सदरचा प्रस्ताव सोमवारी (दि.१२) राज्य निवडणूक आयोगाला सादर करण्यात आला. आता येत्या २३ सप्टेंबरपर्यंत आयोगाकडून प्रस्तावाला मान्यता मिळाल्यानंतर दि. ७ आॅक्टोबरला नागरिकांचा मागास प्रवर्ग आणि महिला आरक्षित जागांसाठी सोडत काढली जाणार आहे. त्यानंतर प्रारूप प्रभाग रचना दि. १० आॅक्टोबरला आयोगाकडून प्रसिद्ध केली जाणार आहे. नागरिकांच्या हरकती व सूचना मागविण्यात येऊन अंतिम प्रभाग रचना २५ नोव्हेंबर २०१६ रोजी महापालिका आयुक्तांमार्फत प्रसिद्ध केली जाणार आहे. (प्रतिनिधी)