गावकऱ्यांनी भीती न ठेवता लसीकरण व सर्वेक्षणाला सहकार्य करावे : गटविकास अधिकारी घोरपडे यांची मंदाणे येथे भेट

यावेळी गटविकास अधिकारी घोरपडे यांनी सांगितले की, कोरोनाच्या पहिल्या लाटेमध्ये राबविण्यात आलेली ‘माझे कुटुंब माझी जबाबदारी’ ही मोहीम राबविण्यात येत आहे. त्यासाठी २८ एप्रिलपासून गावात आरोग्य, ग्रामपंचायत, महसूल आणि शिक्षण विभाग यांच्यामार्फत कोरोनाबाबत व साथीच्या आजारांबाबत सर्वेक्षण करण्यात येत आहे. त्यामुळे गावातील नागरिकांनी कोणत्याही परिस्थितीत घाबरून न जाता जो ही त्रास होत असेल त्याबाबत सर्वेक्षण करणाऱ्या कर्मचाऱ्यांना माहिती देऊन सहकार्य करावे, असे सांगितले. दरम्यान, गटविकास अधिकारी घोरपडे यांनी प्राथमिक आरोग्य केंद्र व जिल्हा परिषद प्राथमिक शाळेत ठेवण्यात आलेल्या लसीकरण केंद्रांना भेट दिली. यावेळी लसीकरणाविषयी नागरिकांनी गैरसमज दूर करणे गरजेचे आहे. ४५ वर्षांपेक्षा जास्त वय असणाऱ्या नागरिकांनी कोणत्याही प्रकारची मनात भीती न बाळगता लसीकरण करून घ्यावे. तसेच येत्या १ मेपासून १८ वर्षांवरील सर्व पात्र व्यक्तींनाही कोरोनाची लस तालुक्याच्या ठिकाणी देणे सुरू झाले आहे. लस पूर्णपणे सुरक्षित असून लस घेतल्यानंतर दोन दिवस त्रास होतो, तर काहींना होतही नाही. कोरोनाला हरवण्यासाठी लसीकरण करून घेणे हीच आपल्यासाठी मोठी ढाल आहे, असे आवाहन गटविकास अधिकारी राघवेंद्र घोरपडे यांनी नागरिकांशी संवाद साधताना केले. यावेळी गटविकास अधिकारी घोरपडे यांच्या हस्ते सर्वेक्षण करणाऱ्या टीमला ग्रामपंचायतीमार्फत खरेदी करण्यात आलेल्या पल्स ऑक्सिमीटर, थर्मल गन व ईतर साहित्याचे वाटप करण्यात आले. यावेळी विस्तार अधिकारी सुरेश देवरे, सरपंच विजय सनेर, उपसरपंच अनिल भामरे यांच्यासह सर्व ग्रामपंचायत सदस्य, ग्रामविकास अधिकारी दिनेश पाटील, वैद्यकीय अधिकारी डॉ. जितेंद्र पाटील यांच्यासह शिक्षक आरोग्य कर्मचारी, ग्रामपंचायत कर्मचारी, आशा वर्कर, अंगणवाडी सेविका व स्वयंसेवक उपस्थित होते.