इस्लाम धर्मात रमजान महिन्याला बरकतीचा महिना असेही म्हटले जाते. संयम, त्याग, शांतता, सहिष्णुता, चांगुलपणा प्रामाणिकपणा रुजविणाऱ्या या महिन्याला मुस्लिम धर्मामध्ये महत्त्व आहे. या महिन्यात सर्व मुस्लिम बांधव अल्लाह (ईश्वराची), इबादत (प्रार्थना) करतात. इस्लामी वर्ष हे चंद्रावर आधारित असल्याने यातील महिने नेहमी फिरत असतात. ३ वर्षात ऋतूचे एक चक्र पूर्ण होते. त्यामुळे हिवाळा, उन्हाळा, पावसाळा या तिन्ही ऋतूत पवित्र रमजान येत असल्याने यावर्षी उन्हाळ्यात आला आहे. भर उन्हाळ्यात सूर्य आग ओकत असताना रखरखत्या उन्हात किमान १४ तासांचा रोजा राहणार आहे. इस्लाम धर्माच्या शिकवणीनुसार प्रत्येकाला रोजे ठेवून अल्लाहची इबादत करणे बंधनकारक आहे. रोजाचा उपवास म्हणजे आत्म्याचे, आचार-विचाराचे शुद्धीकरण होय. मुस्लिम दिनदर्शिकेनुसार रमजान मुबारकचा मुकद्दस महिना नववा असतो. प्रत्येक घरातील लहानथोर मंडळी रोजा ठेवून अल्लाहची इबादत करतात. रोजाच्या अवस्थेत अन्नपाणी सेवनाला सक्त मनाई आहे. पोटाची भूक, पाण्याची तहान याची जाणीव प्रत्येक रोजा करणाऱ्याला व्हावी यासाठी इस्लामने रोजे अनिवार्य केले आहेत. पहिल्या रोजाला बुधवारी पहाटे ४ वाजून ५० मिनिटांनी सुरुवात झाली. संध्याकाळी ६ वाजून ४७ मिनिटांनी रोजा सोडण्यात येत असून रोजे करणाऱ्याला १५ तास अन्नपाण्याविना इतरही नियमांचे काटेकोर पालन करावे लागते. या पवित्र महिन्याच्या दिवसांमध्ये पवित्र कुराण शरीफ ग्रंथाचे वाचन केले जाते. गेल्या वर्षीप्रमाणे या वर्षीही कोरोना विषाणू संसर्गाच्या पृष्ठभूमीवर या पवित्र महिन्यात मुस्लिम बांधव मशिदीत न जाता घरातून नमाज अदा करून अल्लाहची इबादत करत आहेत.
पृथ्वीवरील कोरोनाचे संकट दूर होऊन शांती प्रस्थापित व्हावी यासाठी या पवित्र महिन्यात अल्लाहकडे विशेष दुआ मागण्यात येत आपल्याची प्रतिक्रिया मुस्लिम धर्मगुरूंच्या वतीने देण्यात आली आहे.