गुजर समाज मंचतर्फे शहादा अमरधामला लाकडाचा पुरवठा

तालुक्यात कोरोना विषाणू संक्रमणाने थैमान घातले असून गेल्या महिनाभरात दुर्दैवाने मयतांची संख्या १२५ च्या वर गेली आहे. त्यातून शहादा अमरधाममध्ये शहरासह परिसरातील मयतांवर अंत्यसंस्काराचा लोड वाढला असून तेथे लाकूड टंचाई भासू लागली. याबाबतचे मेसेज व चर्चा सोशल मीडियाच्या माध्यमातून सुरू झाली. हाच धागा पकडून सामाजिक बांधिलकीसाठी कटिबद्ध असलेल्या गुजर समाज मंच ॲडमिन टीमच्या ग्रुपवर एका सदस्याने आपणही समाजाचे देणे लागतो. अशा कठीण प्रसंगी आपल्या टीमच्या सदस्यांच्या आर्थिक मदतीने शहादा अमरधामला पाच टन लाकूड देण्याविषयी आवाहन केले. याला ॲडमिन टीमच्या सर्व सदस्यांनी सकारात्मक प्रतिसाद दिला. त्यातून १० टन लाकूड पुरवता येईल इतका स्वनिधी गोळा झाला. लाकूड खरेदी करण्यासह पोहोचविण्याची जबाबदारी टीमच्या एका सदस्यावर सोपविण्यात आली होती. गेल्या दोन दिवसांत शहादा अमरधामला गुजर समाज मंच ॲडमिन टीमतर्फे १० टन जळाऊ लाकूड टेम्पोद्वारे पोहोच करण्यात आले.