घरातील एक व्यक्ती जरी कोरोना पॉझिटिव्ह आढळून आला तरी घरातील इतर सदस्यांना कोरोनाची बाधा होत आहे. कितीतरी नागरिक कोरोनाचा संसर्ग झाल्यानंतर घरात किंवा इतरांना कल्पना न देता आजाराची लक्षणे असूनही दुखणे अंगावर काढत आहेत. सध्या बेड उपलब्ध न झाल्याने खासगी रुग्णालयांमध्ये रुग्णांना दाखल करावे लागत आहे. त्याठिकाणी रुग्णांसाठी इंजेक्शन उपलब्ध होत नाही. नवापूर तालुक्यातील चिंचपाडा मिशन हॉस्पिटलमध्ये तब्बल १५ रुग्णांना रेमडेसिवीर इंजेक्शनची गरज असताना कोरोना बाधित रुग्णांच्या नातेवाइकांची भटकंती सुरू आहे. परंतु इंजेक्शन मिळत नसल्याने नातेवाईक हवालदिल झाले आहेत. हे इंजेक्शन विकताना अवाजवी पैसे घेऊ नये, इंजेक्शनच्या मूळ किमतीइतकीच रक्कम ग्राहकांकडून घ्यावी, असे नियम असले तरी अतिरिक्त किंमत देऊन हे इंजेक्शन घ्यावे लागत आहे. कित्येक रुग्णांच्या नातेवाइकांना इंजेक्शन आणण्यासाठी गुजरात राज्यात जावे लागत आहे. मात्र, तेथेही इंजेक्शन मिळवताना त्यांची धावपळ होत आहे. इंजेक्शनचा पुरवठा त्वरित व्हावा, रुग्णाच्या नातेवाइकांची धावपळ होऊ नये आणि रुग्णांच्या जीविताला धोका निर्माण होऊ नये यासाठी तालुक्यातील डॉक्टर, होलसेलर आणि औषध विक्रेत्यांनी सहकार्य करणे आवश्यक आहे, असे मत आमदार शिरीषकुमार नाईक यांनी व्यक्त केले.
ग्रामीण भागात अनेक व्यक्ती कोरोनावर उपचार घेत आहेत. त्यामुळे एवढे महागडे इंजेक्शन घ्यायची त्यांची आर्थिक परिस्थिती नाही. परिणामी दुखणे अंगावर काढल्यानंतर दुखणे बळावते व त्यातच रुग्णाचा मृत्यू होतो. यासाठी सरकारने तातडीने ग्रामीण भागात हे इंजेक्शन वाजवी किमतीत मोठ्या प्रमाणात उपलब्ध करून द्यावेत, अशी मागणी जोर धरू लागली आहे.