नवापुरात आरपीटीसीआर कीट संपल्याने रुग्णांचे हाल

आरपीटीसीआर कीट नसल्याने कोरोना रॅपिड टेस्टिंग सुरू आहे. परंतु आरपीटीसीआर तपासणी होत नसल्याने रुग्णांवर उपचार करण्यासाठी डॉक्टरांना अडचणी येत आहेत. जिल्हा प्रशासनाने यावर ठोस उपाययोजना करावी. तालुका प्रशासनाने अनेकवेळा कीटची मागणी केली. परंतु शनिवारी संध्याकाळपर्यंत नवापुरात कीट उपलब्ध झाली नाही. त्यामुळे रुग्ण आरपीटीसीआर तपासणीच्या प्रतीक्षेत आहे.

नवापूर शहर महाराष्ट्र-गुजरात सीमावर्ती भागात असल्याने नवापुरात आरपीटीसीआर कीट संपल्याने रुग्णांना आरटीसीआर तपासणी करण्यासाठी शेजारील गुजरात राज्यात जावे लागत आहे. कोरोना रुग्णांवर उपचार करण्यासाठी सर्वात आधी आरपीटीसीआर तपासण्याची मागणी रुग्णालयात डॉक्टर करीत असल्याने रुग्णांकडे रॅपिड टेस्टिंग अहवाल असतो. काही खासगी व शासकीय रुग्णालयात आरपीटीसीआर टेस्ट नसल्याने रुग्णांवर तोपर्यंत कोरोनाचा उपचार केला जात नाही. यातून रुग्णांच्या जीवितास धोका होऊ शकतो. कोरोनाचा प्रादुर्भाव शरीरात वाढू शकतो. त्यामुळे जिल्हा प्रशासनाने तात्काळ नवापूर शहरात आरपीटीसीआर कीट उपलब्ध करून द्यावी, अशी मागणी होत आहे. नवापूर तालुक्यातील आरोग्य यंत्रणा गेल्या दोन दिवसांपासून आरपीटीसीआर कीटच्या प्रतीक्षेत आहे.

नवापूर तालुक्यातील कोरोना संशयित रूग्ण व नातेवाईकांची तपासणीसाठी नवापूर येथील वरिष्ठ महाविद्यालयाच्या तपासणी केंद्रावर सकाळपासून मोठी गर्दी होत आहे. आरपीटीसीआर कीट नसल्याने तपासणीशिवाय घरी परतावे लागत आहे. लॉकडाऊन सुरू असल्याने रुग्णांना ग्रामीण भागातून नवापुरात तपासणीसाठी वाहने मिळत नसल्याने जादा पैसे देऊन रुग्णांना रिक्षा भाड्याने करून यावे लागत आहे. परंतु तपासणी होत नसल्याने खाली हात परत जावे लागत असल्याने वेळ व पैशांची नासाडी होत आहे. आरोग्य विभागाने शहरी भागासह ग्रामीण भागातही योग्य नियोजन करणे गरजेचे आहे. जिल्हा प्रशासनाने नंदुरबार जिल्ह्यातील कोरोना परिस्थिती नियंत्रित करण्यासाठी करोडो रुपये खर्च करून साहित्य खरेदी केले आहे. कोरोनाचा प्रादुर्भाव वाढत असताना साहित्याची कमतरता ही नागरिकांच्या जीवावर बेतू नये याकडे जिल्हा प्रशासनाने विशेष लक्ष देणे गरजेचे आहे.

शेकडो रुग्ण आरपीटीसीआर तपासणीच्या प्रतीक्षेत

नवापूर तालुक्यात ७७९ रुग्ण पॉझिटिव्ह असून त्यांच्यावर उपचार सुरू आहेत. त्यांच्या संपर्कातील अनेक रुग्ण कोरोना तपासणीच्या प्रतीक्षेत असून तात्पुरती का होईना रॅपिड टेस्ट केली जात आहे. परंतु रुग्णालयात उपचारासाठी गेले असता डॉक्टर आरपीटीसीआर टेस्टिंगची मागणी करीत असल्याने रुग्णांवर उपचार करण्यासाठी अडचण निर्माण होते. आरोग्य विभागाने तत्काळ उपाययोजना करून नवापूर येथे आरपीटीसीआर कीट लवकर उपलब्ध करून द्यावी.

वाढीव बेडसोबत आरोग्य कर्मचार्‍यांची वाढ करावी

नवापूर तालुका कोरोना नियंत्रित करण्यासाठी डॉक्टर, परिचारिका व आरोग्य कर्मचार्‍यांचा तुटवडा असल्याने याठिकाणी वाढीव आरोग्य कर्मचारी देऊन नवापूर तालुक्यातील कोरोना परिस्थिती नियंत्रणात आणण्यासाठी उपाययोजना करण्याची मागणी होत आहे. प्रशासनाने ऑक्सिजनयुक्त बेड वाढविले आहेत तसेच कोविड सेंटरची नवीन निर्मिती केली जात आहे. परंतु आरोग्य कर्मचारी, डॉक्टर्स, परिचारिका यांचीही पुरेशा प्रमाणात नियुक्ती करण्याची गरज आहे अन्यथा कमी कर्मचाऱ्यांवर जास्त कामाचा लोड येऊ शकतो.

आरपीटीसीआर रिपोर्ट लवकर द्यावा

नंदुरबार जिल्ह्यात कोरोनाचे रुग्ण वाढत असल्याने आरपीटीसीआर तपासणी यंत्रणेवर लोड येत असल्याने आरपीटीसीआर तपासणीचा अहवाल तब्बल दोन दिवस उशिरा येत असल्याने रुग्णांवर उपचार करण्यासाठी विलंब होत असल्याने रुग्णांच्या नातेवाईकांनी नाराजी व्यक्त केली आहे.