नंदुरबार : पालिकेतर्फे महिलांसाठी खास जीम सुरू करण्यात येत असून त्याचा शुभारंभ २६ जानेवारी रोजी महिला लोकप्रतिनिधी व अधिकारी यांच्या हस्ते होत आहे. या जीममध्ये केवळ महिलांनाच प्रवेश दिला जाणार असून प्रशिक्षणार्थी देखील महिलाच राहणार आहेत. जीमचे नामकरण विमलाई असे करण्यात आले आहे.
महिलांसाठी आधुनिक जीम करण्याचा संकल्प नंदुरबारच्या नगराध्यक्षा रत्ना रघुवंशी यांनी केला होता. त्या अनुषंगाने पालिकेने सी.बी.पेट्रोल पंपासमोर स.नं.१८७-१ येथील खुल्या जागेत ही जीम साकारली गेली आहे. जीमचे उद्घाटन साक्रीच्या आमदार मंजुळा गावीत यांच्या हस्ते व जिल्हा परिषद अध्यक्षा सीमा वळवी यांच्या अध्यक्षतेखाली २६ रोजी दुपारी तीन वाजता होणार आहे. यावेळी सहायक जिल्हाधिकारी तथा प्रांताधिकारी वसुमना पंत, उपमुख्य कार्यकारी अधिकारी अश्विनी ठाकुर, सहायक आयुक्त तथा उपमुख्य कार्यकारी अधिकारी वर्षा फडोळ, जिजामाता शिक्षण संस्थेच्या अध्यक्षा शोभा मोरे, इंदिरा महिला सहकारी बँकेच्या चेअरमन कविता रघुवंशी, प्रभागाच्या नगरसेविका आशा बालाणी आदी उपस्थित राहणार आहेत.
जीम आधुनिक पद्धतीने तयार करण्यात आली आहे. बंदिस्त व वातानुकूलित आहे. साहित्य, संगीत, योगाभ्यास याकरिता स्वतंत्र व्यवस्था करण्यात आली आहे. सर्व प्रशिक्षक या महिलाच राहणार आहेत.
कार्यक्रमास उपस्थितीचे आवाहन नगराध्यक्षा रत्ना रघुवंशी, उपनगराध्यक्ष रवींद्र पवार, बांधकाम सभापती प्रमोद शेवाळे, पाणी पुरवठा सभापती कैलास पाटील, शिक्षण सभापती नंदा जाधव, महिला सभापती भावना गुरव, आरोग्य सभापती मेहरुन्नीसा मेमन, मुख्याधिकारी राजेंद्र शिंदे यांनी केले आहे.