सोमवारी आमदार कार्यालयात पत्रकार परिषदेचे आयोजन करण्यात आले होते. याप्रसंगी ते बोलत होते. कार्यक्रमास नगराध्यक्ष अजय परदेशी, भाजपा जिल्हा उपाध्यक्ष राजेंद्र राजपूत, तालुका अध्यक्ष बळीराम पाडवी, माजी तालुका अध्यक्ष विलास डामरे, स्वीय सहायक वीरसिंग पाडवी, जगदीश परदेशी आदी उपस्थित होते. ६ मे रोजी माझा वाढदिवस असून, वाढदिवसाचे औचित्य साधून तळोदा शहरात कोरोना रुग्णांच्या सोयीसाठी लोकसहभागातून एक सुसज्ज कोविड रुग्णालय सुरू करण्यात येणार आहे. या कोविड रुग्णालय उभारणीसाठी तळोदा तालुक्यातील राजकीय, सामाजिक कार्यकर्ते, स्वयंसेवी संस्था-संघटना यांनी आपले योगदान दिले आहे.
तळोदा शहरात सुरू होणाऱ्या कोविड केंद्रासाठी विविध सामाजिक संघटना व लोकवर्गणीतून कोविड केंद्र उभारण्यात येणार आहे. अशा आपत्तीच्या काळात दात्यांनी पुढे येऊन या कोविड रुग्णालय उभारणीत योगदान देण्याचे आवाहन त्यांनी याप्रसंगी केले.
या कोविड रुग्णालयाच्या लोकार्पणप्रसंगी जिल्हाधिकारी डॉ. राजेंद्र भारुड, पोलीस अधीक्षक महेंद्र पंडित, माजी मंत्री आमदार जयपाल रावल आदी उपस्थित राहणार याची असल्याची माहिती त्यांनी पत्रकार परिषदेत दिली.
लोकसहभागातून उभारण्यात येणाऱ्या या कोविड रुग्णालयात गरजू रुग्णांना नि:शुल्क ऑक्सिजन बेड सुविधा उपलब्ध करून देण्यात येणार आहे. जिल्ह्यातील नामवंत डॉक्टर या कोविड रुग्णालयात रुग्णांना विनामोबदला सेवा देणार आहेत. त्याचप्रमाणे तळोद्यातील मेडिकल असोसिएशनकडून रुग्णालयात उपचार घेणाऱ्या रुग्णांना औषधे उपलब्ध करून दिली जाणार असल्याची माहिती देखील आमदार पाडवी यांनी दिली.
६ मे रोजी आमदार राजेश पाडवी यांच्या वाढदिवसानिमित्त आमदार निधीतून प्राप्त झालेल्या चार रुग्णवाहिकांचे लोकार्पण केले जाणार आहे. तसेच शहरातील हातोडा रस्त्यावर आमदार निधीतून ओपन जिमचे तसेच हातोडा रस्त्यावरच उभारल्या जाणाऱ्या छत्रपती शिवाजी महाराज असे नामकरण असणाऱ्या प्रवेशद्वाराचे भूमिपूजन केले जाणार आहे.
दरम्यान, ६ मेपासून शहादा व तळोदा येथे आमदार कार्यालयात मतदार संघात रोज सायंकाळी कोविड रिपोर्टमध्ये पॉझिटिव्ह येणाऱ्या रुग्णांच्या लक्षणे व औषधोपचाराच्या पाठपुरावासाठी दोन्ही ठिकाणी प्रत्येकी दोन व्यक्ती २४ तास उपलब्ध राहणार असल्याची व्यवस्था आमदारांकडून केली जाणार आहे. ते रोजचा कोविड अहवाल आल्यानंतर पॉझिटिव्ह रुग्णांशी संपर्क करून त्यांना होणाऱ्या त्रासाची महिती घेऊन त्यांना औषधोपचार उपलब्ध करून व आवश्यक त्या सर्व प्रकारची मदत उपलब्ध करून देणार आहेत. ग्रामीण भागात लोकांच्या मनातील लसीकरणाची भीती व कोरोना बाबतची भीती घालविण्यासाठी युवकांनी जनजागृतीसाठी पुढे येण्याचे व वाढदिवसानिमित्त कोणत्याही प्रकारची भेटवस्तू न देता तो कोविड रुग्णालयाला मदत करण्याचे आवाहन आमदार पाडवी यांनी केले.