तळोदा येथील शेठ के. डी. हायस्कूल येथील कोरोना लसीकरण शिबिराचे उद्घाटन जिल्हा परिषद अध्यक्षा सीमा वळवी यांच्या हस्ते करण्यात आले. शिबिरात २३० नागरिकांचे लसीकरण करण्यात आले. यावेळी तहसीलदार गिरीश वखारे, गटशिक्षणाधिकारी शेखर धनगर यांनी नागरिकांना लसीकरणासाठी नोंदणी करण्याचे आवाहन केले. नोंदणी केलेल्या नागरिकांचे मोहीमस्तरावर लसीकरण करण्यात आले. मोड येथेदेखील सीमा वळवी यांच्या उपस्थितीत लसीकरण शिबिराचे आयोजन करण्यात आले. यावेळी शिक्षणाधिकारी राहुल चौधरी उपस्थित होते.
नंदुरबार तालुक्यात १९०४ नागरिकांचे लसीकरण
नंदुरबार तालुक्यात लसीकरण मोहिमेने चांगला वेग घेतला असून, सोमवारी दिवसभरात एक हजार ९०४ नागरिकांचे लसीकरण करण्यात आले. चार फिरत्या पथकांद्वारे ग्रामीण भागातील लसीकरण करण्यात आले. नगाव येथे १०७, जुनमोहिदा ११०, हाटमोहिदा ४३, वैदाणे २०४ आणि नंदुरबार शहरात ९५७ नागरिकांचे लसीकरण करण्यात आले.
शहादा तालुक्यातही लसीकरण मोहीम
शहादा तालुक्यातदेखील लसीकरण मोहिमेने वेग घेतला आहे. जिल्हा परिषद शाळेतील शिक्षक ग्रामीण भागात जनजागृतीसोबत नोंदणीचे कामदेखील करीत आहेत. त्यामुळे लसीकरणाला नागरिकांचा वाढता प्रतिसाद मिळत आहे. तऱ्हाडी येथे १२३, लोणखेडा ११० आणि लक्कडकोट व अंबापूर येथील ९८ नागरिकांचे लसीकरण करण्यात आले.
धडगाव तालुक्यात लसीकरणासोबत आरोग्य तपासणी
धडगाव तालुक्यातील दुर्गम भागातही फिरत्या पथकाद्वारे लसीकरण करण्यात येत आहे. येथे होत असलेल्या जनजागृतीमुळे नागरिक लसीकरण नोंदणीसाठी पुढे येत आहेत. नागरिकांमधील गैरसमज दूर करण्यासाठी शिक्षकांसोबत तलाठी, ग्रामसेवक, लोकप्रतिनिधीदेखील प्रयत्न करीत आहेत. मुंदलवड गावात तहसीलदार ज्ञानेश्वर सपकाळे यांनी नागरिकांना लसीकरणाचे महत्त्व सांगितले. यावेळी वेगवेगळ्या पाड्यांवरील कारभारी उपस्थित होते. गावातील ५४ नागरिकांचे लसीकरण करण्यात आले. लसीकरण शिबिरासाठी सरपंच सुनीता वळवी, उपसरपंच विनोद वळवी, ग्रामपंचायत सदस्या योगिता वळवी यांचे सहकार्य मिळाले. तालुक्यातील आचपा, पिंपरी येथे लसीकरणाबाबत जनजागृती करण्यात आली. नागरिकांची भेट घेऊन त्यांना लसीकरणाचे महत्त्व पटवून देण्यात आले. खामला येथे ‘माझे कुटुंब, माझी जबाबदारी’ मोहिमेंतर्गत नागरिकांचे तापमान व ऑक्सिजन पातळी तपासणी करण्यात आली.