कोरोनाचा नवा स्ट्रेन आता लहान मुलांसाठीही धोकेदायक ठरु पाहत आहे. साधारणत: शून्य ते १५ वयोगटातील मुलांमध्ये अनेकवेळा कोरोनाची लागण झालेली असली तरी त्याचा तपासणी अहवाल पाॅझिटिव्ह येईलच असे दिसून येत नाही. अनेकवेळा बाधित मुलांना विविध लक्षणे दिसतात तर काहींना ती लक्षणे दिसून येत नाहीत. त्यामुळे लहान मुलांच्या आरोग्यावर त्याचा परिणाम दिसून येत आहे. अशा मुलांसाठी व्हिटॅमिन व इतर औषधी ही महाग असल्याने आर्थिकदृष्ट्या दुर्बल असलेले पालक त्याकडे दुर्लक्ष करतात. या पार्श्वभूमीवर या मुलांना औषधोपचारासाठी मदत देता यावी यादृष्टीने शहादा येथील गंगोत्री फाऊंडेशनने पुढाकार घेतला आहे. यासंदर्भात फाऊंडेशनचे अध्यक्ष अभिजित मोतीलाल पाटील यांनी सांगितले की, माझ्या परिचयातील काही मुलांचा मी अनुभव घेतला. संबंधित पालकांनी औषधीसाठी खर्च जास्त लागत असल्याने मुलांच्या आजाराकडे दुर्लक्ष केले. त्यामुळे यासंदर्भात शहादा व नंदुरबार परिसरातील काही बालरोग तज्ज्ञ डाॅक्टरांशी आपण चर्चा केली. त्या चर्चेतून लहान मुलांच्या आरोग्याचा प्रश्न गंभीर असल्याचे जाणवले. ही बाब आपण आपल्या काही मित्रांजवळ सांगितली. विशेषत: विदेशात स्थायिक असलेल्या काही मित्रांनी त्यासाठी थेट मदत देऊन या मुलांसाठी काही करण्याची सूचना केली. त्यानुसार बालरोग तज्ज्ञांशी चर्चा करून ‘प्रोटेक्ट ऑफ चिल्ड्रेन’ची संकल्पना तयार केली. या संकल्पनेनुसार शून्य ते १५ वयोगटातील आर्थिकदृष्ट्या मागास असलेल्या मुलांसाठी औषधीसाठी अडीच हजार रुपये रकमेची औषधी किट देण्याचे नियोजन करण्यात आले आहे. त्यासाठी जिल्ह्यातील काही बालरोग तज्ज्ञांचा ग्रुप तयार करण्यात आला असून त्यांच्या मार्गदर्शनानुसार हे काम सुरू राहील.
गेल्या वर्षी गंगोत्री फाऊंडेशनतर्फे पाच हजार कुटुंबांना जीवनावश्यक वस्तूंची किट वाटप केली होती. यावेळी आर्थिकदृष्ट्या दुर्बल एक हजार मुलांसाठी अडीच हजार रुपये किमतीची औषधी किट डाॅक्टरांच्या सल्ल्यानुसार देणार असून त्यासाठी २५ लाख रुपयांची तरतूद केली आहे. या प्रकल्पाचा पुढे विस्तार करण्याच्या दृष्टीनेही प्रयत्न राहील.
-अभिजित मोतीलाल पाटील, अध्यक्ष, गंगोत्री फाऊंडेशन, शहादा