कडब्यासाठी बाहेर जिल्ह्यातील पशुपालकांची फिल्डिंग

सातपुड्याच्या पायथ्याशी असलेल्या तळोदा तालुक्यातील प्रतापपूर, राणीपूर, धवळीविहीर, रापापूर, कोठार, वरपाडा, गडीकोठडा, अंबागव्हाण, वाल्हेरी, सोमावल, मोदलपाडा आदी विविध गावांच्या शिवारात मोठ्या प्रमाणात शेतकरी दरवर्षी खरीप ज्वारीची पेरणी करतात. या खरीप ज्वारीला दादर म्हणूनही ओळखले जाते. या परिसरातील तसेच अक्कलकुवा, धडगाव परिसरातील शेतकरीही मोठ्या प्रमाणात खरीप ज्वारीची मोठ्या प्रमाणात पेरणी करतात. ज्वारीच्या कणसाची कापणी केल्यानंतर या परिसरातून मोठ्या प्रमाणात सुका चारा अर्थात कडबादेखील खरीप ज्वारीपासून मिळतो. सध्या तळोदा, अक्कलकुवा तालुक्यातील खरीप ज्वारीची कापणी झाली असून मोठ्या प्रमाणात कडबा निर्माण झाला आहे.

या कडब्याला शिरपूर, शिंदखेडा, नरडाणा, दोंडाईचा, धुळे, पारोळा, चाळीसगाव, मालेगाव या परिसरात दरवर्षी मोठ्या प्रमाणात मागणी असते. मागील आठवडाभरापासून या भागातील पशुपालक व चाऱ्याचे व्यापारी या भागात दाखल झाले असून ज्वारी उत्पादक शेतकऱ्यांपासून कडब्याची खरेदी करीत आहेत. काही जण वाहनाद्वारे परजिल्हात कडबा खरेदी करून घेऊन जात आहेत. ८०० ते एक हजार रुपये प्रती शेकडा या भावाने कडब्याचे बंडल (पुळा) विकले जातात. यावर्षी त्याचे भाव वाढण्याची शक्यता आहे. एक ट्राली किंवा ट्रकमध्ये ९०० ते एक हजार कडब्याचे बंडल मावतात. एक शेतकरी आपल्या व जवळपासच्या शेतातून मिळून किमान दोन ट्राल्या किंवा ट्रकभर कडबा विक्री करीत आहे. म्हणजे कडबा विक्रीतून आठ ते १० हजार रुपये प्रती वाहन शेतकऱ्याला मिळतात.

अजून पाहिजे त्या प्रमाणात कडबा निघत नसली तरी पशुपालक कडबा उत्पादक शेतकऱ्यांना ॲडव्हान्स देऊन कडबा बुकिंग करून घेत आहे. गेल्यावर्षी मार्च महिन्यापासून कोरोनाच्या पार्श्वभूमीवर लॉकडाऊनमुळे पशुपालकांना कडबा खरेदी करता आला नव्हता. त्याचा परिणाम कडबा उत्पादक शेतकऱ्यांवरदेखील झाला. त्यांचेही हजारांचे नुकसान झाले होते. या पार्श्वभूमीवर सध्या कोरोना रुग्ण संख्या वाढत असताना लॉकडाऊनची टांगती तलवार आहे. यामुळे परजिल्ह्यातील पशुपालक आतापासून या भागात येऊन कडबा मिळण्यासाठी फिल्डिंंग लावत असल्याचे चित्र दिसून येत आहे.