घराच्या मालकी हक्काच्या वादातून तलवार व गुप्तीने वार, बाप-मुलगा जखमी

पोलीस सूत्रांनुसार, तुकाराम मंगा कोकणी व प्रदीप शामुवेल कुवर यांच्यात घरमालकी हक्कावरून वाद आहे. ९ जुलै रोजी दोघांमध्ये वाद झाला. रात्री पावणेनऊ वाजेच्या सुमारास प्रदीप कुवर व वकील तुकाराम वसावे हे तुकाराम कोकणी याच्या घरात गेले व त्यांनी, घर खाली करून जा म्हणून सांगितले व शिवीगाळ केली. त्यामुळे वाद वाढला. प्रदीप कुवर याने त्याच्या हातातील तलवारीने तुकाराम कोकणीवर हल्ला केला. वार वाचविण्यासाठी त्यांचा मुलगा राकेश कोकणी याने प्रयत्न केला असता, तो जखमी झाला. शिवाय गुप्तीने देखील वार केले. वकील असलेला तुकाराम वसावे याने तुकाराम कोकणीचे हात धरून, याला ठार मारून टाक म्हणून चिथावणी दिली. या मारहाणीत तुकाराम व राकेश हे बाप-लेक गंभीर जखमी झाले.

याबाबत तुकाराम कोकणी याने फिर्याद दिल्याने प्रदीप कुवर व तुकाराम वसावे यांच्याविरुद्ध ठार मारण्याचा प्रयत्न केल्याप्रकरणी नवापूर पोलिसात गुन्हा दाखल करण्यात आला आहे. तपास सहायक पोलीस निरीक्षक धीरज महाजन करीत आहेत. पोलिसांनी दोन्ही संशयितांना अटक केली आहे.