कोरोना मुक्तीची वंदना करुन भीमजयंती साजरी

लोकमत न्यूज नेटवर्क
नंदुरबार : कोरोनाच्या पार्श्वभूमीवर लॉकडाऊन असल्याने शहरातील बौद्ध समाज बांधव आणि विविध संघटनांचे पदाधिकारी व सदस्य यांनी घरीच डॉ़ बाबासाहेब आंबेडकर यांना अभिवादन केले़ यावेळी करण्यात आलेल्या बुद्ध वंदनेतून कोरोनामुक्त विश्व होऊन ‘सबका मंगल हो’ असे चिंतन करण्यात आले़
जिल्हाधिकारी आणि पोलीस अधिक्षक यांनी काही दिवसांपूर्वी केलेल्या आवाहनाला प्रतिसाद देत नागरिकांनी महामानव डॉ़ बाबासाहेब आंबेडकर यांची १२९ वी जयंती ही घरी राहून साजरी करण्याचा निश्चय केला होता़ यानुसार शहरातील विविध भागात राहणाऱ्या समाजबांधवांनी सकाळी पांढरे कपडे परिधान करत डॉ़ बाबासाहेब आंबेडकर, तथागत गौतम बुद्ध, महात्मा फुले, संत कबीर, सावित्रीबाई फुले, संत गाडगे महाराज आणि छत्रपती शिवाजी महाराज यांच्या प्रतिमांचे पूजन केले़ यानंतर बुद्ध वंदना करत महापुरुषांना अभिवादन केले़ दुधाळे शिवारातील कोकणी हिल, शहरातील आंबेडकर चौक, समता कॉलनी, शाहू नगर, गणेश नगर बुद्धविहार, सरगम कॉलनी, यासह विविध भागात नागरिक घरोघरी दिवसभर विविध उपक्रमातून महापुरुषांच्या विचारांवर चर्चा करत असल्याचे दिसून आले़ शहरातील काही संघटनांकडून आॅनलाईन पद्धतीने सोशल मिडिया गु्रप आणि यूट्यूब चॅनल सुरु करुन त्यावर प्रबोधनात्मक विषयांची मांडणी केली़ शहरातील काही सेवाभावी कुटूंबांनी गरजूंना अन्न वाटपासह, कोरडा शिधा वाटप करुन जयंती उत्सवासाठी संकलित केलेल्या रकमेचा विनियोग करण्यात आला़
१४ एप्रिलच्या पार्श्वभूमीवर पोलीस दलासह जिल्हा प्रशासनाकडून कार्यालयांमध्ये डॉ़ बाबासाहेब आंबेडकर यांच्या प्रतिमांचे पूजन करण्यात आले़

जिल्ह्यातील विविध भागात डॉ़ बाबासाहेब आंबेडकर यांचे पुतळे आहेत़ नंदुरबार शहरातील साक्री नाका येथील पुतळ्यावर रोषणाई करण्यात आली होती़ याठिकाणी प्रातिनिधिक स्वरुपात समाजबांधव, प्रशासनातील अधिकारी यांनी पुष्पहार अर्पण केले़ जिल्ह्यातील इतरही ठिकाणी याचप्रकारे अभिवादन केले गेले़