बकऱ्या चारण्यास गेलेल्या मुलाचा सोबतच्या मित्राने केला गळा आवळून खून

याबाबत पोलीस सूत्रांनी दिलेल्या माहितीनुसार, गणेश प्रभू पाडवी (११), असे मयताचे नाव आहे. ३० एप्रिल रोजी दुपारच्या सुमारास गणेश त्याचे मित्र विकास गोविंद ठाकरे व शैलेश ठाकरे यांच्या सोबत बकऱ्या चारण्यासाठी रोझवा प्लॉटच्या जंगलात गेला होता. दुपारी विकास ठाकरेने तलावडी गावातील राज मंगल पाडवी यांच्या मोबाइलवर गणेशचे वडील प्रभू रामसिंग पाडवी यांना सांगितले की, त्यांचा मुलगा गणेश हा कोठार रस्त्याला पिंप्रीच्या झाडाखाली बेशुद्धावस्थेत पडलेला आहे. तेव्हा विकास ठाकरे व कैलास ठाकरे हे बेशुद्ध अवस्थेत असणाऱ्या गणेशला घरी घेऊन आले. त्यावेळी गणेशच्या गळ्यावर काळसर रंगाचे व्रण दिसत होते. त्यास तळोदा उपजिल्हा रुग्णालय येथे घेऊन आले असता गणेश यास तेथील डॉक्टरांनी तपासून मयत घोषित केले. त्याबाबत तळोदा पोलिसांत अकस्मात मृत्यूची नोंद करण्यात आली होती.

परंतु मयत गणेशच्या गळ्यावर दोरीचे व्रण दिसून आल्यामुळे त्याचे वडील प्रभू रामसिंग पाडवी यांना त्याच्या मृत्यूबाबत संशय आला होता. त्याबाबत संपूर्ण खात्री केली. तलावडी गावातील विकास ठाकरे व शैलेश ठाकरे यांच्याबरोबर त्यांचा मुलगा गणेश पाडवी हा बकऱ्या चारण्यासाठी गेला असता उसाच्या शेतात बकऱ्या चरत असताना विकास ठाकरे याने गणेश यास बकऱ्या वळण्यासाठी पाठवले; परंतु गणेशने त्याला नकार दिला. या कारणावरून व मागील भांडणाच्या कारणावरून मनात राग धरून रोझवा प्लॉटकडे उसाच्या शेतात पिंप्रीच्या झाडाखाली गणेश यास एकटा गाठून त्याचा दोरीने गळा आवळून त्याला ठार मारले, अशी फिर्याद मयत गणेशचे वडील प्रभू रामसिंग पाडवी यांनी तळोदा पोलिसांत दिली. त्यांच्या फिर्यादीवरून विकास गोविंद ठाकरेविरोधात खुनाचा गुन्हा दाखल करण्यात आला आहे. पुढील तपास पोलीस निरीक्षक पंडितराव सोनवणे करीत आहेत.