पोलिस सूत्रांनुसार, गुरूवारी सायंकाळी सहा वाजेच्या सुमारास टेलिफोन ऑफिससमोर एक कार (क्रमांक जी.जे.०५ टीसी ००१७) महामार्गावर मध्यभागी उभी दिसून आली. त्याठिकाणी कारमध्ये कोणीही नव्हते. प्रत्यक्षदर्शींनी तात्काळ नवापूर पोलिसांना फोन करून बोलवले. पोलिसांनी गाडीची तपासणी केली असता मागच्या सीटवर प्लॅस्टीक टेपच्या सहाय्याने तोंड बांधून संपूर्ण शरीरावर व हातापायावर गळ्यावर धारदार शस्त्राने वार केलेला एकाचा मृतदेह दिसून आला. नवापूर पोलिसांनी कारच्या क्रमांकाची खात्री केली असता काहीही निष्पन्न झाले नाही. कारच्या पासिंगवरून सदर इसम हा सुरत भागातील रहिवासी असल्याचे बोलले जात आहे. निर्घृण हत्या करून मृतदेह नवापूर शहरानजीक कारमध्ये आढळून आल्याने परिसरात मोठी खळबळ उडाली आहे.
मृतदेह नेमका कोणाचा? कोणी खून केला? नवापूर शहरात कार का सोडून गेले? हत्याकांडामध्ये नवापूरचा काही संबंध आहे का? याबाबत पोलीस तपास करीत आहे. घटनास्थळी नवापूर पोलीस ठाण्याचे पोलीस निरीक्षक बाळासाहेब भापकर, सहायक पोलीस निरीक्षक धीरज महाजन व पोलीस कर्मचार्यांनी भेट देऊन पाहणी केली. कारची तपासणी केली असता काही कागदपत्रे पोलिसांच्या हाती लागली आहेत. त्यावरून पुढील तपास सुरू आहे. मृतदेह नवापूर उपजिल्हा रुग्णालयातील शवविच्छेदन कक्षात ठेवण्यात आला आहे. ही कार महामार्गावरून क्रेनच्या सहाय्याने पोलीस ठाण्याकडे नेण्यात आली आहे.