अर्धापूर (नांदेड ) : तालुक्यातील नांदेड-हिंगोली महामार्गावरील पिंपळगाव पाटीजवळ दुचाकी व ट्रकच्या झालेल्या अपघातात दोघांचा मृत्यू झाला़ तर एक जण गंभीर जखमी झाला आहे़ ही घटना मंगळवारी सकाळी घडली़
११ सप्टेंबर रोजी सकाळी ११ च्या सुमारास नांदेडकडून भोकर फाट्याकडे येणारा ट्रक (क्रमांक एम.एच.२६ एच.५८३३) व नांदेडकडे जाणारी दुचाकी (एम.एच.२६ बी.एच.४१३७) यांच्यात समोरासमोर झालेल्या धडकेत दुचाकीवरील तिघांपैकी नंदकिशोर संभाजी कदम (वय २० वर्ष रा.दाभड) हा जागीच ठार झाला़ तर जखमी युनूस शेख इक्बाल शेख (वय २५) व अरबाज शेख इक्बाल शेख (वय १८ रा.दाभड) यांना नांदेडच्या शासकीय रुग्णालयात दाखल करण्यात आले़ यातील युनूस शेख इक्बाल शेख (वय २५) याचा उपचारादरम्यान मृत्यू झाला़
सदर अपघाताची माहिती मिळताच महामार्ग सुरक्षा पथकाचे सपोउपनि भीमानंद महाबळे व पोहेकॉ गजेंद्र मांजरमकर यांच्या मार्गदर्शनाखाली पोहेकॉ महागावकर, पोकॉ गणेश पंजोल, प्रवीण माने, माधव गुट्टे, वसंत शिनगारे यांनी घटनास्थळी धाव घेऊन जखमींना तात्काळ नांदेड येथील कै.शंकरराव चव्हाण वैद्यकीय महाविद्यालयात अधिक उपचारार्थ दाखल केले़