नांदेड : जगभरासह देशातही चलनाला पर्याय ठरू पाहणाऱ्या बिटक्वाॅइन या डिजिटल चलनाच्या महाजालात देशभरातील अनेक जण फसले गेले आहेत. या घोटाळ्याचे मुख्य सूत्रधार भारद्वाज बंधूंनी गुंतवणूकदारांकडून बिटक्वाॅइन घेऊन त्या बदल्यात स्वत: तयार केलेले ‘एम कॅप’ हे चलन माथी मारले. त्यावेळी ‘एम कॅप’चे बाजारात मूल्य केवळ १४ हजार रुपये, तर बिटक्वाॅइनचे ७४ हजार होते. परंतु, हेच एम कॅप जर गुंतवणूकदारांनी भारद्वाजला विक्री केले, तर तो त्या बदल्यात अर्धीच किंमत देत होता. अशा प्रकारे बिटक्वाॅइन आणि एम कॅप या दोन्ही आभासी चलनाद्वारे हजारो जणांना गंडविले.
नांदेडात एमजीएम काॅलेजमधून २००४ साली साॅफ्टवेअर इंजिनिअरिंगचे शिक्षण घेतलेल्या अमित भारद्वाज आणि त्याच्या टोळीने देशभरात केलेल्या गेन बिटक्वाॅइन घोटाळा प्रकरणात मार्चमध्ये ‘सीबीआय’ने देशभरात छापे टाकले आहेत. त्यामुळे नांदेडातून सुरू झालेला हा घोटाळा पुन्हा ऐरणीवर आला आहे. नांदेडातील आयुर्वेद महाविद्यालयातील एका डाॅक्टरला भारद्वाजने ५५ लाखांचा गंडा घातल्यानंतर सर्वप्रथम या प्रकरणाची व्याप्ती लक्षात आली होती. त्यानंतर महाराष्ट्र आणि देशभरातच भारद्वाजच्या विरोधात गुन्हे दाखल होण्याची मालिकाच सुरू झाली होती. फसवणूक झालेल्यांची संख्या मराठवाड्यात बरीच मोठी असल्याचे सांगितले जाते.
१० टक्के परतावा दिल्याने विश्वास वाढलाभारद्वाजने गेन बिटक्वाॅइनमध्ये गुंतवणूक केल्यास महिन्याला १० टक्के परतावा देण्याचे आमिष दाखवून अनेकांकडून बिटक्वाॅइन घेतले होते. सुरुवातीचे तीन महिने त्याने परतावाही दिला. परंतु, त्यानंतर तो टाळाटाळ करू लागला. त्यात काही गुंतवणूकदारांना त्याने बिटक्वाॅइनच्या बदल्यात स्वत: तयार केलेली डिजिटल करन्सी ‘एम कॅप’ दिली. त्यावेळी ‘एम कॅप’चे बाजारमूल्य फक्त १४ हजार रुपये होते, तर बिटक्वाॅइनची किंमत ७४ हजार होती. परंतु, हेच बिटक्वाॅइन खरेदीदाराने पुन्हा भारद्वाजला विक्री केल्यास त्याची तो निम्म्याहून कमी किंमत देत होता.
पुण्यात अटक होताच मूल्य घसरलेअशा प्रकारे भारद्वाजने बिटक्वाॅइन ग्रोथ फ्रंट या कंपनीच्या माध्यमातून गुंतवणूकदारांना बिटक्वाॅइन आणि एम कॅप या दोन्ही आभासी चलनाद्वारे हजारो कोटी रुपयांना गंडविले. भारद्वाजला पुणे पोलिसांनी अटक केल्यानंतर एम कॅपचे मूल्य बाजारात चिल्लर पैशावर येऊन पोहचले होते. त्यामुळे लाखो रुपयांचे बिटक्वाॅइन गेले अन् एम कॅपचाही खुर्दा झाला, अशी अवस्था भारद्वाजने गुंतवणूकदारांची केली होती.
पाॅश हाॅटेलमध्ये घेतले जात होते सेमिनारअमित भारद्वाज आणि त्याच्या साथीदारांनी नांदेडातील पाॅश हाॅटेलमध्ये एम कॅपमध्ये गुंतवणुकीसाठी सेमिनार घेतले होते. त्यापूर्वी बिटक्वाॅइन खरेदीसाठी नांदेडातील अनेकांनी झेब पे या ट्रेड कंपनीचा वापर केला होता. हे बिटक्वाॅइन खरेदी केल्यानंतर ते भारद्वाजकडे देण्यात आले होते.